Los efektos psikolojikos del koronavirus en las personas

Dora NİYEGO Judeo-Espanyol
15 Nisan 2020 Çarşamba

Ande vamos a estar en sesh mezes, un anyo, u diez anyos? Las noches esto kedando espyerta de pensar kualo el futuro esta aparejando por mis keridos. Agora ya savemos ke tokar las kozas afuera de kaza, estar kon otras personas i respirar el ayre en un lugar serrado va ser danjerozo por mozotros. Las personas ke estan en vida agora, no se van a pueder kompletamente olvidar lo ke estamos bivyendo oy. 

Si esta kriza kontina muncho, puede ser ke en el futuro, kuando la kriza va pasar, vamos a kontinuar a lavarmos las manos munchas vezes al diya, u no vamos a kerer tomarmos las manos kuando vamos a rankontrar un amigo, u mos vamos a espantar de tokarmos la kara. Puede ser ke mos vamos a sintir mijor kuando estamos solos, o mos vamos a fuir de las personas ke no semos muy entimos. La komunikasyon kon las personas por seguro va trokar. En lugar de avlar kara kon kara, vamos a preferar a eskrivir en el internet. La komodidad de estar en prezensya de otros va ser ramplasada por una mijor komodidad komo avlar en el internet, espesyalmente kon akeyos ke no konosemos muy bueno. Ansi puede ser ke mos vamos a sintir mas seguros en estando fizikamente leshos de las personas (komo lo semos oy). 

Poko a poko, las presyones de esta epidemiya van a krear un efekto profondo en muestra psikolojiya. Estas presyones van a enfluensar la manera ke pensamos, la manera ke komunikamos kon otros, i las kozas ke son valorozas por mozotros.

Esta kriza kreo una grande insertitud en las personas. No savemos komo pensar u kualo azer en estas sirkonstansyas ke son muevas por mozotros. Ken va ser afektado de esta epidemiya? Muestros keridos se van a pueder protejar? Puedemos tener konfiensa en los testes? Kuando se va eskapar esto? Ke karar va kontinuar? Komo mos vamos a pasar si no lavoramos?

La kombinasyon de la insertitud i del peligro esta afektando muestra psikolojiya. Tenemos menester de tener konfiensa en las enformasyones ke mos estan dando, estar seguro de lo ke se esta pasando, i de lo ke se va pasar. Keremos ver la luz a la fin del tunel, un tunel ke en este momento se esta vyendo sin fin.

Los psikologes dizen ke en kondisyones de insertitud las personas se syenten atiradas a solusyones simples i razonavles, komo blanko i preto. Algunos son pesimistos, otros optimistos. 

En estos momentos se prefera una direksyon otorizada i segura. Keremos ke un lider mos diga ‘No vos espantesh, ya estamos azyendo todo posivle, por seguro todo se va enderechar’.

Mezmo las valores ke damos emportansa trokan en estos momentos de kriza. Empesamos a dar emportansa a valores komunales komo kooperasyon, konsiderasyon i kudyo por otros. Las valores endividuales komo prestij, popularidad, i rikeza empesan a pedrer emportansa.

Puede ser ke esta kriza va tener tambien efektos pozitivos en las personas: vamos a dar mas muncha emportansa a valores umanitaryas.

Agora lo ke es de rogar es ke esta kriza pase kon poko de piedridad, i tornaremos a los diyas de antes kon sanedad i repozo.

 

Siz de yorumunuzu yapın

Tüm Yorumları Görün