Rachel Amado Bortnick (de Texas), presidente de muestro grupo LADINOKOMUNITA, amante de muestra lingua Sefaradi, el Judeo-Espanyol, avia organizado un viaje a Turkiya. Eya mizmo es de İzmir.
Su buto sin dubyo era de dar la posibilita de azermos enkontrar los unos kon los otros i diskutir para azer kontinuar la lingua i no desharla olvidar.
Partisiparon nombrozos amigos de todas partes del mundo, miembros avlantes i eskritores en muestra lingua ansestral, el Judeo-Espanyol.
Grande keyf para mozos los Turkanos de resivirlos i partajar dias maraviyozos, kon mis keridas amigas istanbulliyas Klara Perahya, Güler Orgun, Eliz Gatenyo i munchas otras.
Mos adjuntimos al grupo en İzmir ande vinimos kon Viktor, mi marido.
Agora estavamos en el salon del otel en İzmir, dezayunando djuntos kon mi marido, kuando tornimos la kara para rengrasiar una damma ke se aserko de muestra meza:
“Buenos dias. Me yamo Beki Bahar, so miembra de Ladinokomunita. Vine esta demanyana de Estambol...” “Buyrun efendim a muestra meza, dezayunaremos endjuntos.” “Kon grande plazer!”
Enkontrar la dulse Beki Bahar (de bendicha memorya) ke respektamos tanto por su kultura, fue una sorpreza grande.
Solo la konosiya por sus performansas. La estimada autora era la ermana de una amiga, Ester Rabinovich, kon ken tomavamos lesiones de bridge.
Absolutamente enteresante, Beki komemorando su ermana mos disho:
“Konosesh puede ser mi livro de poemas ke dediki a mi ermanika Ester Morhayim Rabinovich, ansi ke a mi madre, padre i a todos los ke en mi chikez me avlavan en esta lingua.”
“Malorozamente no. Komo puedo toparlo?”
“Lo tengo en mi chanta. Va ser para mi un plazer de ofrirlo.”
El livro de poemas lo ilustri, ma malorozamente no alkansi i no lo pude amostrar a Beki...
Keridos lektores, dos poemas ke me inspiraron a desinar ensima de mi livro ke deskuvri en mi biblioteka, despues de tantos anyos. Me va permeter de mostrarvos estas pajinas, i si su ijo lo kereria, sera un plazer de ofrirlo...
.
El livro de poemas
KORONAS POEMAS
Beki L. Bahar
Enflorese en la alma koplas ke enkanta su propia persona
KORONA
El ke fue sinkuenta anyos
La korona de mi vida
Ni me embivda
Ni me kita
Korona de mi vida
Ni me syento espartida
Kuando avlando
Kuando kayado
Syempre estas a mi lado.
Nunka seras olvidado...
El Dio ke mos korone de sanedad.
Pesah alegre, keridos lektores.
