• Mozotros semos una jenerasyon ke meldimos en la eskola primera la konosensya de la patria, en el lise la sosyolojia, la lojika i la filozofia. Por esto en la kompetisyon de “Ken Kere 500 Milyones” (es una kompetisyon bazada sovre la edukasyon, i la saveduriya), puedemos ganar 15.000 liras sin tener una ayuda de dingunos.
• Semos una jenerasyon ke izimos tres egzamenes eskritos, i un egzamen oral en el tyempo ke estavamos en la eskola. Kopyavamos del vizino ma mos ambezavamos tambyen en kopyando.
• Semos una jenerasyon ke save la eksportasyon de “Endonezya” i la importasyon de “Surinam”. Teniyamos una kultura jeneral sovre todo el mundo.
• Muestra jenerasyon no desha ir su madre i su padre al azilo de los vyejos. Los miramos komo reyes fina la fin de sus vidas.
• Semos una jenerasyon ke no dizimos ke estamos en viyaje para no asistir a los funerales de muestros paryentes. No semos egoistos, tenemos kerensya i respekto al den frente.
• Savemos la valor del sakrifisyo, de la ermandad. Semos fideles, tenemos este sentimyento. Puedemos sakrifikarmos por los otros. Akseptamos la famiya de muestro amigo komo muestra famiya. Semos la jenerasyon ke tyene el sentimyento de la onor.
• Kuando tenemos problemes, no mos vamos a los psikologos i pedagoges para dar un monton de moneda. Semos una jenerasyon ke resolva sus problemes entre la famiya i los keridos sin dar un grosh.
• Semos una jenerasyon ke aze munchos sakrifisyos de muestro egoismo, para pueder protejar muestra famiya moralmente i materialmente.
• Semos una jenerasyon ke bushka sus amigos de 70 anyos en todos los kantones, para estar endjuntos, avlar, burlar i pasar el tyempo, i mos sintimos muy orozos de estar kon eyos.
• Semos una jenerasyon ke akumulo amigos i aliados de setenta, ochenta anyos.
• Semos una jenerasyon ke save djugar bilyas, saltar kon la kuedra, aboltar la peonsa (topaç), djugar saklambaç (kash-kash), voleybol, seksek en la kaye, basketbol, futbol i munchos otros djugos.
• Semos una jenerasyon ke malgrado todas las imposibilidades, djugimos futbol, basketbol, voleybol i mos ambezimos a nadar, solamente para azer spor.
• Semos una jenerasyon ke savemos la valor de todo, ke komer afuera es verguensa, komer kon bruyido es verguensa, kuando se mete la asukar al vazo de chay menear kon la kuchara es verguensa, ke kuando uno mos aze una remarka, lo tomamos en konsiderasyon.
• Kuando la profesora mos travava el oyido no mos ivamos a kaza i no mos keshavamos kon muestra madre u padre porke saviyamos ke, muestro padre se va inyervar kon mozotros. Guay si la profesora dyo keshas al elevo oy, la madre, el padre, el tiyo, la tiya, la granmama, el granpapa vyenen a la eskola i aharvan la profesora en dizyendole: “Tu komo puedes bozdear la psikolojiya de muestro ijiko?” No tenemos una relasyon serkana kon esta jenerasyon de oy. La profesora era la egzistensya la mas sakra, la rikeza de muestra jenerasyon.
• Semos una jenerasyon ande la palavra del ombre pasava, ma el ombre dava una valor grande a la mujer, el padre konsultava sus ideas kon su famiya.
• Semos una jenerasyon ke kito lo mas poko de vagabondos, ladrones, dependyentes de droga, personas ke azen los echos kon dar a komer moneda, manyakes i anormales.
• Semos los ijos de una jenerasyon de una kalita alta i edukada. Los ke terminaron el lise akel tyempo son muncho mas valutozos i savidos de los ke terminaron oy la universita. Allado de eyos mozotros izimos doktora en el punto de vista de la edukasyon.
• Vozotros mansevos de esta jenerasyon, no mos menospresyesh, damos la valor ke meresemos. Asigun mi, trata de ser komo muestra jenerasyon. A la fin puede ser, el pais se va salvar.
• Keridos Lektores la eskrita es tomada de: “Nüzhet Altınel”. Las verdades me plazyeron tanto ke, la traduizi por pueder partajarla kon vozotros.
