Un kavzo difisil a kreyer

Dora NİYEGO Judeo-Espanyol
22 Ocak 2020 Çarşamba

Despues de trenta anyos, la madre de Mohammed se reunyo kon su ijo ke bive en Gaza. Mohammed vino a Israel el 4 de Desembre 2019. Mohammed esta dizyendo ke no se esta kreyendo ke yego a este diya. Una noche antes ke venga a Israel, no durmyo noche entera.

Komo una madre puede kontinuar a bivir savyendo ke tiene un ijo en Gaza? Eya no pudo verlo, no pudo komunikar kon el. Deve de ser muy difisil por Rina, la madre de Mohhamed.

Rina se aviya namorado de un Gazan trenta anyos antes. Tuvo un ijo de el. El padre lo fuyo a su ijo a Gaza. Rina peryo la trasa de su ijo. Mohammed se engrandesyo komo un palestinyano en Gaza. Kuando Mohammed vino a Israel, los jurnalistos le demandaron komo se komportaron los gazanos kon el? “Muy bueno”, disho Mohammed. “Mezmo ke saven ke sos judyo, no te atakaron, no te maltrataron?”  “No, nunka. Ay buenas personas en Gaza”, disho Mohammed.

Dos anyos antes, Rina se desido a bushkar a su ijo. Eya estuvo en kontakto kon la organizasion ‘Yad L’achim’, ke se okupa de topar las mujeres ke se kazaron kon non judyos i trayerlas a Israel.

Un miembro de Yad L’achim disho ke Rina los bushko despues de ke sus vizinos, sus paryentes la forsaron a kontaktarlos. Eya no se estava kreyendo ke iva pueder reushir. “En Yad L’achem, tomimos este kavzo kon kuatro manos. El kontakto kon el se izo kon grande atansyon para ke dingunos no sepan. En primero deviyamos de verifikar su identidad para saver si esta persona era la persona ke estavamos bushkando, i kuando estuvimos siguros, empesimos a azer los prosesos”.

Antes dos anyos i medio, Rina le telefono a su ijo, i le disho ke eya era su madre. Mohammed no se kreyo en primero, i se lo demando a su tiyo. Kuando se izo siguro ke es su madre, empeso la relasion. En el empesijo, empesaron a avlar kon un traduktor. Entremientes, Mohammed se ambezo el ebreo. “De kualo estavash avlando?” le demando el jurnalisto. “Muestras konversasyones eran sovre la vida, sovre temas de la vida. Kon tiempo, empesimos a azermos mas intimos. Kuando aviya gerras en Gaza, mi madre se estava mirikiyando por mi. Me estava dizyendo ke no salga a la kaye, ke me proteje bueno”, respondyo Mohammed.

Kon la ayuda de la Ley del Retorno i la ayuda de Yad L’achim, reusheron a tomar la identidad israelyena. Mohammed se estava espantando de vinir, ma un diya le disho a su madre “Aparejame el pasaporto, ya esto vinyendo”.

Segun la Halacha judiya, Mohammed es judyo, ma segun la ley muzulmana, el es muzulman. “Vas a trokar tu relijion?” le demando el jurnalisto. “La relijyon no es un problema. Lo ke es emportante es de ser una buena persona, no emporta de ande sos”. Kuando le demandaron si sus amigos se estavan enselando ke iva vinir a Israel, Mohammed disho ke ya se estavan enselando porke en Israel ay respekto por las personas, por la vida. Tambien ay echo. Gaza es una grande prizion. El mijor pais en el Medio Oriente para bivir es Israel. La djente keren bivir en Israel. “Mis amigos se alegraron kuando les dishe ke me vo ir a Israel. Disheron ke se van a eskarinyar de mi, ma ke iva ser muy bueno para mi”.

Agora, Muhammed esta en Israel. Va bivir kon su madre. El lavoro ya esta pronto para el. Tiene grandes esperansas por su mueva vida. Su madre disho ke kere ke su ijo se kaze en Israel. Muhammed disho ke kere ver inyeve. No vido inyeve en su vida, solo en la televizyon.

 

Siz de yorumunuzu yapın

Tüm Yorumları Görün