KONSERTO DE HANUKA DEL GRUPO DE MUZIKA DE NES A LOS PANSYONERES DE OR-YOM

Dora NİYEGO Judeo-Espanyol
31 Aralık 2019 Salı

La noche de Alhad, el 22 de Desembre ke era el primer diya de Hanuka  asendimos la primera kandela de Hanuka. La fiesta de Hanuka es el sembol de muestra libertad, la viktorya de muestro puevlo i la selebrasyon de la tranzisyon del puevlo judyo de la obskuridad a la luz.

Komo kada anyo, empesimos las selebrasyones de Hanuka kon diversas aktividades i konsertos organizados por muestra sosyedad.

El koro de muzika Nes, el segundo diya de Hanuka, dimos el treser de muestros konsertos a los pansyoneres de la organizasyon Or-Yom.

Komo los pansyoneres de Or-Yom ya saven ke kantamos populares kantikas en Ladino, kada anyo mos asperan a kuatro ojos. Las kantikas en Ladino, kon lakel los judyos sefaradis se komunikaron durante sinko siglos, son muy presyozas para eyos. La djente ke son mas grandes de sesenta anyos konosen muy bueno esta lingua i las kantikas. En oyendo esta muzika, les vyene a los ojos la vida de un tyempo, los suvenires ermozos, los vizinos kon ken frekuentavan kada diya, las kantikas ke las mujeres kantavan en gizando en la kuzina.

En el konserto de este anyo, muestro maestro İzzet Bana eskojo las kantikas las mas populares kon muncha atansion. Durante el konserto, la partisipasyon de los pansyoneres en laskantikas, mos dyo grande enerjiya. Todos endjuntos kantimos kon grande alegriya, baylimos, i mos divertimos. A la fin del konserto, le aperejimos una surpriz a Izzet Bana, le kantimos la kantika “Happy Birthday” i el personel de Or-Yom le trusho un gato kon kandelas enriva.

En salyendo de Or-Yom, suetimos ke la luz de Hanuka mos trayga diyas aklarados, kon sanedad i pas.

Akel diya admirimos muncho las dammas volontaryas, en vyendo los esfuersos ke estavan azyendo para animar los pansyoneres. Apresyimos sus esfuersos ke azen en aparejando diversas aktividades, i ekskursyones para elevar el moral de los pansyoneres.

Or-Yom es una enstitusyon unika en muestro paiz. Los pansyoneres estan mirados kon grande atansyon. El personel profesyonal les apareja las komidas, se okupan de la limpyeza, i de la salud de los vyejos. No solo la salud, el manikur i el pedikur para mujeres, el korte de kaveyos, arapar a los ombres, todo se realiza kon djente profesyonal. Las dammas voluntaryas los yevan al ospital para azerles los kontroles medikales. Los diyas de martes, el grupo de entretenimyento los yevan a komer en un restorante en el Bosfor, o a un teatro, o sinema. Tambien los yevan a teatros o konsertos aparejados  por las enstituyones de muestra komunidad. Las voluntaryas realizan aktividades para ayudarles a mijorar sus abilidades manuales.

Los administradores keren mas muncho ayudo de muestra komunidad. Keren ke mas munchos voluntaryos les ayuden para realizar sus objektivos. Keren ke los donatores esten a sus lado para ayudar a mas munchas personas. Esta enstitusyon es la mas emportante de muestra sosyedad. Dingunos no puedemos saver lo ke el futuro mos esta aparejando. Or-Yom es la sola enstitusyon ke tenemos para los vyejos. Mejorar esta enstutisyon es por el byen de todos.

 

 

Siz de yorumunuzu yapın

Tüm Yorumları Görün