Kerida Fani,
Me gustaria ke mos kontes de tu madre, la presioza Madam Aelion, ke konosi por la primera vez durante una de muestras aktividades kulturales en la kaza de enverano de Klara Perahya, de bendicha memorya, en los anyos 1975.
Se organizava las “The Bridge beneficte” en las kazas, para ayudar las famiyas menesterozas de muestra komunita judia. Las dammas veniyan nombrozas, la entrada serviya para muestro buto.
Madam Aelion era una de muestras profesoras i giya. No mankava de avrir sus puertas kon su kara de riza i preparar las borekas famozas i las dulsuryas para ofrir a los invitados.
Eran nombrozas en akeyos tiempos... La Asosiasion “Matan Baseder Bihur Holim” ande lavoravamos i mos reunisavamos los lunes kon muestro presidente inolvidavle i egzemplario: Robert Filiba, de bendicha memorya.
Mos ambezavan komo afalagar los ke no saviyan demandar. Vijitavamos las kazas ande moravan en Galata para organizar a distribuar.
No me puedo olvidar mi primera vijita kon Klara. Eya avia yamado en judeo espanyol (ke yo no avlava akel tiempo):
-Rashelika, ayde, abasha hanum, estamos en la kaye delantre de tu kaza.
Distribuavamos mizmo poko, un paketo kada mez, oyir los problemes sanitarios grasias a muestras doktores i diskutir para pueder deskuvrir la realita en azyendo anketas.
Keridos lektores, mi amiga Fani Ender mos va presentar a Madam Aelion, su madre i una de las grandes donadoras, ke su alma repoze en Ganeden...
ESTERIKA
MI MADRE KERIDA
Kada madre es sin duda, unika i valoroza para sus ijas i ijos. Ansi es ke mi kerida madre Ester era a mis ojos la mas perfekta ke puederiya ser.
Ester Aelion (Rodrig) nasyo en Edirne en 1924. Sus parientes eran Isak Behor Rodrig i Vida Razon. Esterika era la mas chika de 5 ermanos (2 ijos i 3 ijas). Los dos ijos fueron mandados a estudiar a Paris. Moiz, el grande de eyos murio en tiempo de gerra, en un aksidente de motorsikleta, en keriyendo fuyir de los Almanes. Jozef, se adjunto a un grupo de rezistantes i kedo en vida grasias a su amiga – i mas tadre su mujer - Therese ke le ayudo i lo guadro.
Despues del grande pogrom de Trakya en 1934, las tres ermanas Elza, Suzanne i Ester i sus parientes fueron ovligados de abandonar Edirne i establesersen en Istanbul alkilando un apartamento en la Kula. Esto fue un grande golpe para el padre, ke por demas perdio en primero su fortuna i mas tadre su vida, agotado a kavzo de una emorajia serebral. Poko tiempo mas tadre, la mama, Vida ke sufriya de asukar avansada, lo suivo deshando las tres ijas solas i guerfanas en Istanbul. Ester teniya solamente 14 anyos. La vida no fue del todo fasil para eyas. Tuvieron ke lavorar duro para ganar el pan. Era tiempo de gerra i mizmo el pan era aksesible kon karne (vesika).
Unos dos anyos pasaron i Ester abandono sus estudios en la Aliansa para empesar a lavorar en una fabrika de kalsas ande el patron era un Judyo. Es ayi ke iva enkontrar a Sami Aelion, mi papa. Sami era el shef de Ester i tuvo muncho kudyo de eya en akompanyandola a su kaza kuando tornavan tadre la noche. Poko tiempo mas despues, se rendieron kuento del amor ke los aviya apanyado.
Desidaron de kazarsen ma aviya un grande obstaklo. Los parientes de Sami aunke no la konosiyan, no kerian a Ester porke eya no teniya ni dota ni moneda i siendo de Edine, no konosiyan dingunos de su famiya. Pasaron anyos i una muy buena amiga de los dos mansevos, Kamer Daron Verter los ayudo para azer una konspirasyon. La madre de Kamer i la de Sami eran muy amigas i todas las dos famiyas moravan en Kuzguncuk. Una fin de semana, Kamer envito Ester a kedarse en su kaza. Ansi es ke los parientes de Sami, Fani i Leon Aelion la konosyeron. Ester fue un “coup de foudre” para los paryentes. Tanto les plazyo ke de akel diya en delantre, la adoptaron komo sus ijas i no la desharon mas. Ester de su parte los miro i tuvo kudyo de eyos kon grande amor i dedikasyon asta sus diyas de alkavo morando kon eyos i los trato siempre kon dulsor i amistad.
Komo Ester supo lo ke es la mankura i la estrechura, siempre kudyo a lo ke no mos manke nada, materyalmente i moralmente. No solo para su famiya ma tambien para los ajenos. Eya fue una amiga sinsera i verdadera para todos los le la konosyeron. Siempre pronta para korrer a ayudar al de enfrente. Me akodro ke en mi chikez, me yevava a kazas de famiyas ajenas ke eya sekretamente ayudava yevandoles kozas i envelopes de moneda antes de las fiestas, para ensenyarme lo ke se devia de azer a los nesesitados.
Esterika de Rodrig (komo mi padre la yamava) muryo en mis brasos en Israel en Avril 2017 kuando vino a vijitarmos a Tel Aviv, sin dinguna sufriensa, sin travar i sin yevar kama de hazina komo siempre lo dezeyava. Realizimos su dezeyo de al kavo en yevandola a enterrar a Ulus /Istanbul al lado de su kerido Sami.
