Puedesh eskuchar melodias de la muzika Sefaradi del koro NES

Organizado por muestro Prezidente de la Komunita Sefaradi d’Estambol, Silvyo Ovadya, antes 3 anyos me invitaron komo korista a partisipar a kantar. 

Muestro kerido İzzet Bana, “İzzet Hoca”, kreo la union de muestro grupo: “NES”... Semos un grupo, no komo amigas, ma komo una famiya ke kudyamos los unos kon los otros. Grasias a İzzet ke se sakrifika i mos da un keyf imenso...

KONOSER MUESTRO GRUPO DE DAMMAS AMIGAS MUY KERENSIOZAS I PERFEKTAS fue un regalo presiozo...

Estamos vizando oy a mijorar muestro koro “NES”, kantando la muzika sefaradi i esperamos un diya de pueder kantar en la Medina.

En 18 Julio, 2019, kantimos en BÜYÜK ADA ANADOLU KULÜBÜ.

Muestro grupo i la sala yena mos kontento.

Muestro maestro İzzet mos felisito por la performansa, ansi ke Nazım Hoca ke mos ambeza la teknika.

Keridas amigas koristas, es un plazer de prezentarvos a mis lektores de muestro jurnal Şalom. 

Realmente so muy oroza ke desde 3 anyos, apartengo a una famiya de koristas. Muestro shefe, İzzet Bana, aze esforsos para adelantarmos kada diya en renforsar muestras relasiones i ermozear muestro kamino kantando la muzika Sefaradi... Rengrasios de alma i korason a Nazım Hoca tambien...

Emel Benbasat 

 

Entri el anyo pasado a este grupo. Realizimos un konserto en Oryom i en Neve Şalom. El de Anadolu Kulübü me motivo de kantar kon el akompanyamento de piano, violon, ets.

İzzet mos ambeza Shan i Nazım Kerkez mos ambeza a kantar.

La amistad se renforso. Esto kontente de estar kon este koro.

Rina Yanni

El konserto del 18 Julio estuvo reushido. A mis keridas koristas i al kerido İzzet i al Prof. Nazım i sus amigos muzisienes, un gran rengrasio.

Rose Modiano

 

Esto sigura ke muestro konserto de Anadolu Kulubü estuvo reushido.

Kantar kon mis amigas me da un keyf grande.

Luset Kohen

 

Ambezar kon el koro Nes i mis profesores me kontenta.

“İyi ki varsınız!” Me metitesh alma.

Ceni Bahar

 

El konserto me rendio oroza ke las kansiones ke serian olvidadas i no konosidas si no las kantavamos. Kantarlas i azer kantar los jovenes es un sentimiento muy agradavle. Rengrasio los ke fueron mis profesores.

Asperando un otro repertuar...

Suzi Kovos

 

Muestros avuelos kantaron, lo kantimos en el konserto. Azer akodrar las kansiones Judeo-Espanyolas es muestro buto, i komunikarlas a los jovenes.

La muzika es una KURA a los ke kantan i a los ke asisten a los konsertos.

Virjinia Kalaora

 

Este sigundo konserto en Anadolu Kulübü me gusto, por ke aprovimos a krear un ponte del pasado a muestros dias. Kuando vide la ansamble ke mos akompanyaron kon ojos briyando, me rendi kuento ke se va konservar esta kultura ke es un Trezoro.

Zizet Kuruner

 

Es una kontentes para mi de azer parte de muestro grupo.

Kantar es una terapia muy agradavle. Mos amuzamos djuntos tambien.

Forti Barokas

 

Estamos aziendo bivir las kantikas de muestra lingua Sefaradi en kantandolas. Para tenerlas bivas. Si estamos puediendo transferar muestra eksitasion i emosion, semos orozos.

Sara Halfon

 

Mersi, Esti... Desde 3 anyos partisipo al koro Nes. En muestros konsertos tenemos de todo - las aedadas i pueder tokar los sentimientos de los jovenes; i mas i mas de konoser amigas me da un grande plazer.

Tuna Mizrahi

Kerido İzzet Bana; komo remarkas, el grupo te amamos i te konsideramos por tu fakulta de saver dar la armonia i tu buen korason.

Estamos asperando de estar djuntos para kantar.

Siempre alegrias - sos muestro ermano...

El esprito ke marko la nochada de 18 julio 2019:

La sala yena de invitados, silensio, el konserto empesa... Un telefono sona - es el telefono de la damma asentada en el primer rango.

İzzet, kon su buen umor, malgrado todo, la mira, torna la kavesa i se adresa a Nazım Hoca:

- Nazım, teniyamos esta melodiya en el repertuar?

 

Keridos, por mankura de lugar, en El Amaneser konoserash las otras koristas ke tomaron parte en el konserto de Büyükada – la Isla de los Prenses.