Isak Pinhas mos desho la buena vida

El platano de byenfesensya de muestra komunita mos desho la buena vida… “İSAK PİNHAS” ke tu alma repoze en gan-eden entornado de luzes!

Şeli GAON Judeo-Espanyol
26 Haziran 2019 Çarşamba

Keridos Lektores, oy kero komemorar, un ombre presyozo, entelijente, umano, progresisto, apiadoso, monumento de la modestiya, djustisya i de la realita. Lo konosi antes ocho anyos kuando empesi a lavorar en el Gran Rabinato de Estambol.

Un dia ke estava en una reunyon, mi kolaborador me disho ke “Fortune i İshak Pinhas”, unos de los mas grandes donatores vinyeron a vijitar el gran rabino i me introduizo  al salon por azerme konoser kon eyos. Un ombre grasyozo, alto, ojikos bivos, teniya una grande konfiensa en si mizmo (z”l) El avlava poko ma propyo.

Nasyo en Çorlu en una famiya muy prove i no pudo estudyar. Kaliya ke lavorara para mantener su famiya. A 20 anyos se kazo kon “Fortune” i se fueron a Israel. Fue un ombre reushido i riko a kavza ke teniya una mandra grande ande aziya los kezos los mas savrozos en Israel kon el nombre de “Los Kezos de Pinhas.”

La mujer “Fortune” syempre le ayudo i le dyo grande apoyo en todo modo de koza. Eya lavoro kon el anyos i anyos…

Era un ombre un poko seryozo, ma la mujer syempre lo enaltesyo. Kuando estava en la eskola uvo el rash (deprem) de Erzincan. En la eskola arekojeron moneda para ayudar a las personas ke fueron aharvadas en este dezastre.

“İshak Pinhas” komo no teniya paras tomo de su amigo 10 groshes komo devda, i esto lo teniya en el korason komo un ah, ke no pudo pagar su devda.

Despues de anyos largos pago esta devda en azyendo una eskola de 700 personas en Çorlu. Mizmo ke paso 71 anyos, en 2010  kuando se avyo la eskola “İshak Pinhas” en su avla disho: “Yo no pude estudyar ma kero i dezeyo ke buenas personas estudien aki i adelanten el pais”.

A parte de esta eskola, el era un byenfetor apiadoso ke aviya embiyado 5 tonas de kezo a 1.000 famiyas en el anyo 2011 kuando uvo el rash de Van. Syempre dadivoso, izo munchas donasyones a la komunita de Estambol, al ospital de Balat, a la eskola djudiya, al azilo de los vyejos i a otras organizasyones i asosyasyones. El no tornava de la palavra ke kito de la boka. Lo ke diziya era ley de Moshe. Era difisil de konvenserlo en kualker koza.

Me fui al lado de Fortune para asistir a los meldados i a la orasyon ke se izo en el simeteryo. En mizmo tyempo para akompanyarla i darle pasensya. El Grand Rabino Rav İshak Haleva, el Presidente de muestra komunita, Ishak Ibrahimzadeh i el vise presidente, Moris Levi asistyeron tambyen a las orasyones.

Este apoyo fue apresyado de la parte de su mujer i en mizmo tyempo se enkanto i no se kreyo ke los grandes de la komunita de la Turkiya vinyeron solamente para el defundo. Siguramente le izo muncho plazer. Mizmo ke estava muy hazino i aviya mas de un mez ke estava en el ospital, agora es una grande soledad para Fortune ke no tyene kriyaturas.

Espero ke kon tyempo se va auzar i va akseptar la realita de la vida.

Ke su alma repoze en gan-eden. Amen…

 

 

 

Siz de yorumunuzu yapın

Tüm Yorumları Görün