Mané-Katz (1894-1962)

Esti SAUL Judeo-Espanyol
29 Mayıs 2019 Çarşamba

Vijitar Israel en el mez de Mayo es un regalo; otro mazal fue de deskuvrir el Muzeo Mané-Katz en un sityo enkantador de Hayfa, situado en las alturas del Monte Carmel, a traverso los pinos i arvoles kon flores de kolor mov resplendesyentes, kon vista de la mar “ultra-marin” del Golfo de Hayfa i los Montes de Galilea.

Su vida: Mané-Katz nasyo en 1894, en Krementchug, Ukranya. Su padre, Lazar Katz, era sammas, meldava la Bibliya i el Talmud i los ambezava a sus 8 kreaturas. Las noches de Shabat, su madre metiya el mantel blanko i asendiya las kandelas. El joven Mané iva a la Yeshiva, kon sus ermanos.

Elie, un guerfano ke aviya pedrido sus paryentes en un fuego, fue akojido en la kaza de los Katz. Este mansevo de 15 anyos, para divertir los ijos de la famiya, les ambezo a desinar ensima de papel, i a kortar kartones. Esto fue la okazyon ke aktivo la vokasyon del futuro pintador Mané-Katz.

Por azardo, los desenes multikolores kayeron en las manos de Rebecca, la patrona de una episeriya, ke tuvo la buena idea de apegarlos ensima de los katramizes de bonbón, para atirar a los klientes. Paul Rabinovich, un elevo de Beyos Artes de Odessa, remarko el dono i la fervor de Mané-Katz i le konsejo de azer estudyos seryozos de Beyos Artes.

Para pueder ir a estudyar en la “Akademiya de Arte de Kiev”, el chiko Mané pintava fotos de rezin kazados, para arrekojer unos kuantos kopekes.

Un paryente leshano, el Dr. Levine, lo resivyo en Kiev i lo prezento al senyor Gourvich, grande amator de arte i Konsul de Danimarka, ke lo izo profitar de su rika biblioteka i le dyo una kamareta komo atolye.

En 1913, realizo el dezeo loko ke teniya de ir a Paris para perfeksyonar su arte, ande yego kon 25 rubles en la aldikera. Ayi en el Carmon Studio, enkontro el famozo pintador Haim Sutin (Jewish School of Paris) i se entegro a esta eskola de korryentes modernos artistikos. Partisipo a las ekspozisyones en los Salons d’Automne, Salons de Tuileries i Salons des Artistes Indépendants.

En 1921, sus pinturas de la vida Judiya inspiraron muncho intereso.

Viyajo munchas vezes a Israel, para pintar el Judyo en su ambyente natural.

Durante la Sigunda Gerra Mundyal, bivyo en los Estados Unidos, ekspozando sus ovras en New York, en Chicago i resivyendo premyos i kupas.

En 1945, torno a Paris, en su ermozo studyo en Notre-Dame. Tuvo la okazyon de pintar i de ekspozar portretos de famozos intelektuales komo Paul Valéry, François Mauriac; muzisyenes komo Mischa Elman, Pablo Casals, ets. Estos portretos fueron muy apresyados por los komersantes, ke le enkomendaron sus portretos a sus torno.

En 1958, la Munisipalidad de Hayfa le ofresyo esta kaza maraviyoza, i el lego sus ovras i koleksyones a la Sivdad de Hayfa.

Keridos Lektores,  

Vos sueto alegrias por la fiesta importante de SHAVUOT

 

 

Siz de yorumunuzu yapın

Tüm Yorumları Görün