Kuando se demandava a una ninya kualo kere azerse, respondiya: “ Me vo azer novya!”. Oy, kualo responde? Muy probavle no va dizir “ser novya” o “madre”. Aktualmente, las muchachas keren ser los dos, madres i mujeres de karyera. Muy natural. Es sus derechos.
Kualos son estos derechos de la Mujer, ke se avlan tanto kada 8 del Marso? En prinsipyo, son los derechos ke le asiguran en todo domeno de la vida komun, igualidad kon el ombre... En los domenos sosyal, ekonomiko, politiko ets... Son derechos fundamentales achetados por organizasyones internasyonalas komo la O.N.U (Nasyones Unidas), I.L.O (Organizasyon Internasyonala del Lavoro) ets. La Deklarasyon Universal de los Derechos del Ombre es tambien un dokumento ke asigura la proteksyon de estos derechos.
El prinsipyo de igualidad fue syempre al orden del diya en las demokrasias del Oksidente. Portanto, en estos paises, las mujeres dyeron una grande lucha para pueder obtener el derecho de elijir. El mas importante dokumento rezultando de esta lucha, fue el “Akordo sovre los Derechos Politikos de la Mujer”, achetado en la O.N.U i entrado en vigor el 7 Julio 1954. Aki en Turkiya, desde el 1934, ya se aviya konosido a las mujeres el derecho de votar i ser elijidas. En la eleksyon del 1935 eyas uzaron este derecho. Malorozamente, en diversas periodas, solamente un chiko shifro de mujeres reusheron a entrar al Parlamento. Puedemos dezir ke por la ora, eyas no se entegraron kompletamente a la Politika...
Organizasyones komo “El Movimiento de la Libertad de la Mujer” lucharon para obtener los mizmos derechos sosyal de los ombres, la libertad de edukasion, de lavorar, de eskojer su karyera i su manera de bivir, entre otros derechos. En syertos derredores estas organizasyones provokaron reaksyones negativas, de sorte ke el movimiento kamino muy avagar. Finalmente la O.N.U deklaro el anyo 1975, komo “Anyo Universal de la Mujer”.
Teorikamente la igualidad parese egzistir... Ma, en pratika!? Malgrado los anyos i las luchas ke dyeron las mujeres, kuantas reusheron a obtener sus derechos? Por siguro munchas, ma no todas. No kero ser konsiderada komo pesimista, ma devo dezir ke oy no puedemos pretender un radikal o grande amijoreamiento en este domeno.
Reelmente esto es un sujeto bastante ondo, i yo no me syento enteramente kompetente de analizar. Solamente, puedo ekspozar mis opinyones, bazandome sovre los rezultados de las enkuestas amostrando ke en syertos paises o syertas komunidades, uvo muy chiko trokamiento, por no dezir “nulo”, en la situasyon de las mujeres. Se trata por lo mas, de presyones tradisyonalas o relijyozas, ke son obstakolos delantre la emansipasyon i libertad de estas mujeres.
Oy estamos pudyendo avlar, eskrivir en Judeo-Espanyol... Azyendo esforsos para no deshar olvidar la Kultura Sefaradi. Puede ser, aktualmente se diskute ke grado la Madre Djudia esta kontinuando su misyon de “Transmisyon” de muestra Idioma i Kultura.
Es un sujeto ke merese konsiderasyon. Par konsekuensa, no me esto sintyendo el “Derecho!” de ekspozar mi idea de una manera unilateral. Prefereriya un interkambiyo de opinyones... ser testigos de la evolusyon, de la emansipasyon de muestras ijas, inyetas (futuras madres), mos glorifika. Tyenen la libertad i el “Derecho” de azer altos estudyos para aparejarsen una karyera. Las estamos vyendo kaji en todos los domenos profesyonal.
