Sadi Baruh En Masada

Muestro kerido amigo kornisto de İSTANBUL SENFONİ ORKESTRASI, SADİ BARUH, no me refuzo, apenas en Turkiya, mos konto su viaje.

Esti SAUL Judeo-Espanyol
13 Mart 2019 Çarşamba

Puedes kontarmos siertos konsertos o viajes ke te desharon una trasa en tu vida?

El konserto ke realizimos por los 60 anyos de la fondasion de Yerushalayim. Por la razon ke se simbolizo la amistad entre la Turkiya i Israel, fue una emosion inolvidavle: LOS VIOLINES DE LA ESPERANSA...

Un otro muy enteresante, entre tantos otros: BİR MÜZİKAL, BİR GERÇEK, MASADA.

Novembre 2007 fue una alegria. El muzikal MASADA tuvo grande sukseso en Estambol – Taksim. Se alegro ATATÜRK KÜLTÜR MERKEZİ durante 3 noches.

La muzika realizada por el Libretto de Shuki LEVY, esta ovra majestika de Shell DANIELSON se metio en shena komo una ovra maestra.

La ovra fue realizada perfektamente por “Dostluk Yurdu” por los artistos amatores ke fueron realmente profesionales - el dekor, los kostumes. la koreografia...

La realizasion tuvo el mismo sukseso en Estambol komo “Damdaki Kemancı” i “Evita”. Los muzikales no eran komun en Turkiya.

Bazado sovre realidades istorikas, MASADA fue un sujeto de interes para mi.

Mi ermano buchuk, Metin Baruh, violonisto ke bive en Fransia, viene a Bodrum kada enverano. Me konto su projekto de ir a viajar a Israel kon su famiya. Me desidi de ir tambien. Sovre todo avia de vijitar Masada, por mi kuriozita por los sitios antiguos...

MASADA se topa al este de la Mar Muerta, si se mira kon ojo de pasharo.

Una noche antes de suvir a Masada, desidimos de kedarmos en el Youth Hostel ke se topa serka de la estasion de Teleferik.

Despues de tomar el kafe kon la famiya, presto vijitimos el sitio antiguo. Las giyas elektronikas mos aklararon de la istoria interesante. l la muzika de fondo ke me emosiono verdaderamente era:

LA MUZIKA DEL KONSERTO DE 2007 EN ESTAMBOL - MASADA MUZİKALİ...

No va pueder deskrivir mis sentimientos orozos.

Vijitimos kon intereso el sitio antiguo djunto kon el muzikal.

Las restorasiones delikadas de los objetos me sorprendio. No iva ser posivle de remarkar la partida restorada si no uviera la riga para separar la partida orijinal de la partida restorada.

En 4 oras terminimos el muzeo tambien i suvimos kon el teleferik a Masada. Abashimos a pie a la Mar Muerta. Nadimos en la maraviya agua salada - Ke fuersa...

Despues de tres oras, EILAT i los pishkados, la vaye de TINMA, el Krater MITZPE RAMON - FORMIDAVLE.

Los dos dias lo pasimos agradavlamente kon muestros parientes ke biven en Israel.

Tuve i la posibilita de vijitar el Museo de Tel Aviv. Los Empresionistos me atiran entre los tablos modernos.

Mos separimos kontentes, yo para Estambol i Metin por la Fransia. 

 

Kerido Sadi, espero ke estar djuntos kon tu buchuk Metin i la famiya te se va fadar munchas vezes en tu vida...

Vos Sueto PURIM ALEGRE, para munchos anyos kon tu muzika ke mos onora...

 

Siz de yorumunuzu yapın

Tüm Yorumları Görün