El Dia Internasional Del Ladino/Judeo Espanyol Una Reushita Muy Apresiada...

Esti SAUL Judeo-Espanyol
13 Şubat 2019 Çarşamba

Kon el Sentro Sefardi de Estambol fiestimos kon alegria el Dia Internasional del Ladino/Judeo Espanyol. La lingua ke ainda bive i ke azemos bivir i transmeter a los jovenes. El Judeo-Espanyol, la lingua de rekuerdos. La lingua de muestros padres.

Una lingua es un medyo de komunikasion i Kultura. Las tradisiones, los uzos, las kantikas, el arte, el gizado, la istoria i los projektos, la alegria, las esperansas...

Eya apartyene a kada uno de mozotros, a la mujer aedada komo a la mansevez, orozamente.

Es la ekspresyon de una kultura. La lingua ke estava “en veilleuse” por ke la desharon despareser antes mas de syen anyos - unos entelektuales avian desidado la muerte de la lingua de muestros padres.

Tuvimos la oportunidad de reunir los amantes del Judeo-Espanyol fasinados del program riko. Vos transmeto un chiko rezumen.

Tuvimos la sorpreza de ver MARIE-CHRISTINE VAROL ke estava pasando por Estambol. Mos konto su topadura kon su esfuegra.

1 - La konferensia de FRANÇOIS AZAR, un entelektual de la Universita Sorbonne invitado de Paris.

La elegansa de saver kontar mos achileyo el korason kon sus konsejikas savrozas.

Solo unas frazas de estos kuentos muy simpatikos:

La donzeya baylabona su shakayika feminin.

La estoria de Moshiko el atavanado bravo. 

Una otra estoria de los mijores de mozotros; el del Djoha titireyando; oy es perşembe oy es çarşamba, lo karishtireyates; ets... 

Apanyar i arankar el kambur i echarlo al tavan...

Los kuentes uno mijor del otro izo riyir la sala yena de la eskola Judia de Ulus. eskola. No keriyamos ke se aretara de amuzarmos...

2 - Parodias maraviyozas presentadas por: SUZET – ŞELI - ANNA “Milizina i Salud”. Muy perfektas, las tres mos kontaron i resivieron palmas i bravos de los amantes de arte.

Por mankura de lugar no va pueder darvos detalyos malorozamente...

Fue de no mankar: Profesionales en poko tiempo...

3 - SELIN TOLEDO i CAN RODRIG EVRENSEL.

Una grande sorpreza de saver ke muestros jovenes se estan aprontando para remplasarmos i azer kontinuar muestra lingua paternal el Judeo-Espanyol... 

Grande rengrasio... Estuvo muy enteresante de ambezar la etimolojia del fruto la portokal.

4 - YURI SASSON, entereso el salon. Mos konto sus sentimientos profundos i la spiritualita.

5 - LA KOMIDA SEFARDI... SAVROZO! La kofte, las avas kon espinaka,

la bulema i la savor de boka. Manos bendichas...

6 - GUTE KON CHAY, KAFE, BOREKAS i BISKOCHOS.

Todos muy kontentes de gostar las borekitas bien preparadas i los biskochos de raki abundantes...

Konserto de CENK ROFE - Las kantikas espanyolas kon la boz luzya de Cenk me izo akodrar mi mansevez en Büyük Ada, el golf ande mos topavamos i El Anadolu Kulübü, Yekta, ande baylavamos kon mi espozo.

Kantimos djuntos kon Cenk... Invito a Karen i İzzet Bana en la shena. 

El tema era el amor en muestras kansiones...

TEATRO: LOS MACHUKADOS. Eskrito por FORTİ BAROKAS, dirijado por FERİT KOHEN, enterpretado por KAREN GERSON ŞARHON i HENRİ ÇİPRUT, ets.

Asistimos a una klasa de jovenes liseanos, ijas ke se burlaron de la profesora. Los ijos i las ijas kon la uniforma de la eskola, elegantes, aziendo shakayikas i atakanandosen los unos kon los otros, djugaron perfektamente... 

Los espris i sovre todo, el «Andımız” ets. tradusido en judeo-espanyol, gano un premio grande de mi parte... Rengrasio FORTİ BAROKAS.

Los jovenes djugando kon las balas de papel i imitando los tikes i la kaminada de la diktatrisa estavan grandes yaramazes.

Eya aksiya, dandoles notas, avia desidado de kastigarlos i no azerlos pasar de klasa...

Kon sus elevos, djugo komo aktrisa de anyos.

Desidaron de azersen perdonar, ablandarla... Reusheron a afalagar la profesora i en la shena del final, los vemos kon el diploma en sus manos, kontentes de la rezolusion, djuntos kon la profesora.

 

Realmente estuvo un dia muy reushido...

Mos alegrimos de ver la sala yena de muestra komunita de Estambol felisitandomos de muestros esforsos por la konservasion de muestra lingua ansestral, por el SENTRO SEFARDI de ESTAMBOL.

Un grande rengrasio a Silvyo i a Karen - Para munchos anyos, inshala...

Siz de yorumunuzu yapın

Tüm Yorumları Görün