Forti Barokas
El 13 Enero, dia de alhad, la tadre a la ora 19.30 tuve la shans de kontemplar un filmo maraviyozo “EL ULTIMO KOSTUM (THE LAST SUIT) en el oditoryo de la eskola djudia. Un filmo de PABLO SOLARZ kon los aktores, Miguel Ángel Solá - Ángela Molina - Olga Boladz – Julia Beerhold i Natalia Verbeke.
Un ombre nasido en Polonya en una sivdad nombrada Lodz, fue kondanado a muerte
en la sigunda gerra mondial el i su famiya en un kampo de konsantrasyon. El tuvo la shans de bivir i dospues de la gerra kon ayuda de un amigo de chikes parvino a fuirse a Argentina, Buenos Aires. A los 88 anyos ya estava byen vyejo i hazino de la una pyerna, sus ijas desidaron de operarlo i kortarle la pyerna firida i mandarlo a un azil.
Ma el teniya un dezeo de yevar un vestido ke le aprometyo a su amigo ke le ayudo. Antes ke vengan a tomarlo para yevarlo al ospital, a media noche salyo de su kaza i aya empeso el kamino largo i kansado. De Buenos Aires a Madrid de Madrid a la Fransya de la Fransya a Varshovia i a Lodz. Djusto ke kito la esperansa de topar a su amigo de chikes ke lo salvo, kon ayuda de una infermiera Poloneza lo topo en su kaza ke morava antes 70 anyos.
Vos ize un chiko resumen del filmo; por siguro ke verlo del empesijo fin alkavo es otro kyef. Mas ermozo no se puediya kontar i akodrar de el olokosto sin trenos, sin kampos de konsantrasyon i sin travalyas. Lo ke me plazyo mas muncho fue ke el filmo era avlado en espanyol i no meldi las eskrituras; lo entendi muy byen. A la fin del filmo komo syempre mos aklaro İSAK KOLMAN enriva el olokosto ke se va komemorar al 24 de enero en Ankara. Remersiamos a SEYFİ İŞMAN por esta tadrada ermoza, por los filmos i dizimos nunka mas.
