El anyo 2019 ke mos trayga a todos la esperansa, la alegriya i la felisita…

Şeli GAON Judeo-Espanyol
9 Ocak 2019 Çarşamba

Un anyo muevo es un presipyo ke kontyene todo modo de evenementos, mos da la kuryozita, la emosyon. Todos mozotros devemos de ser pozitivos i realistos. Kualo asperamos de la anyada 2019?

Lo mas emportante estabilidad en todo modo de punta de vista en el pais. Mizmo ke es difisil, kale konservar la esperansa.

Entrando a un anyo muevo, esto dezeando la kerensya i la pas en el mundo entero. Esto esperando ke en esta anyada mueva todas las gerras, las katastrofas i las amarguras ke se terminen i avriremos una oja mueva para la felisita en el mundo.

Personalmente penso ke las personas deven de konservar sus esperansas para poder kontinuar a bivir, para poder luchar kon los problemes.

Mizmo si estamos muy pesimistos, para poder depasar este estado kale ke konservemos muestra aftaha (ümit).

Tenemos en el doredor konosidos, amigos, keridos ke estan hazinos, personas ke estan luchando para un bokado de komer, para bivir, personas de muestro entorno, de muestras famiyas, mansevos ke se estan muryendo. Esto todo mos esta trayendo el pesimizmo, i estamos peryendo el guste i la gana de bivir.

Ma no kale desharmos i demoralizarmos; kale estar muy fuerte para pueder rezistir a las difikultades. Porke la vida es una lucha permanente sin tomar reflo.

Delantre de unos kavzos puedemos kedar irremediavle (çaresiz) i mos puedemos demandar u mos puedemos revoltar en dizyendo, “deke las personas buenas se estan indo, i los negros estan kedando?”

La persona es apta a ansyearse por kualker koza. Mos estamos ansyeando por el avenir de muestra famiya, ijos, ijas, padres, madres, el entorno, por muestros keridos, amigos, aliados... En el dor ke estamos bivyendo la vida esta muy difisil para todos en el mundo entero. El dor troko, la teknolojia muy avansada mato la valor de muestras kostumbres.

En este estado ke mos topamos puedemos pensar ke la anyada 2019 va kontinuar kon todos los puntos  negativos i nada no va trokar?

Iluzyonarse i pensar ke esta iluzyon va ser verdad, tener esta esperansa, lavorar i luchar es la mijor koza, para poder liberarse de este pesimizmo.

No kale pedrer la esperansa mizmo en los momentos los mas difisiles i areskuros. Porke esperar es kreyer ke va naser un muevo diya ermozo despues de todas las amarguras, de todas las penas. No se puede bivir sin esperar ni sin iluzyones.

“Henry Miller” disho: “Ay una kreensya detras de todo lo ke es kreativo. Los dezeos son provizoryos, ma los miraklos son produsidos solamente porke tenemos la kreensya en el Todo Poderozo”.

Todos mozotros puederemos bivir kon la Kreensya, Esperansa, la Fidelita, la Pas i la Kerensya. Ke nunka la Luz de Kreensya, i de la Esperansa no manke de muestra Vida!

Keridos Lektores, vos oguro la anyada 2019 ke seya para todos, yena de sanedad, de felisidad i de esperansa.

Siz de yorumunuzu yapın

Tüm Yorumları Görün