Un Paseo Kon Mois Gabay

Şeli GAON Judeo-Espanyol
3 Ocak 2019 Perşembe

Antes dos semanas tuve el grande plazer de partisipar a un paseo kon “Mois Gabay” ke es el famozo gia de muestra komunita. A parte ke es gia, “Mois” da lesones en la eskola djudiya sovre la “Kultura Djudiya”.

El paseo era organizado en el entorno de “Kadiköy, Yel değirmeni i Moda”.

A las dyes de demanyana mos topimos kon el grupo de 40 personas, en el sentro de  Kadiköy, djusto enfrente de la eskala de los vapores.

En primero mos fuimos a pye a la sinagoga “Hemdat Israel” ke se topa en “Yel değirmeni”.

La sinagoga Hemdat Israel se konstruizo en el anyo 1899. Los planos de esta sinagoga fueron desinados por un arkitekto otrishyano (avusturyalı) i se pudo terminar kon las donasyones jenerozas de la “Barones Clara de HIRSCH”.

La avyertura fue arba de “Rosh-Ashana” en el 3 de Septembre del anyo 1899.

El senso de Hemdat Israel es: “La Kerensya de los Ijos de Israel”.

Es una sinagoga arreglada djusto en el stilo sefaradi klasiko.  Es una sinagoga de la mas vyejas ke se topan en Estambol. La mizma de la lampa grandiosa ke se topa en medyo de la sinagoga esta en el palasyo de “Dolmabahçe”.  En todas las partes, puedemos ver el marmol blanko. La partida del Ehal es echo de marketeria de sedef (sedef kakma) i delantre del Ehal ay dos kandiles de plata.

En la baza de marmol se topan munchos tapetes valutozos turkos.

Despues konosimos la maalle de Yel değirmeni. Despues del fuego de Dağhamam en 1872, todos los djudyos ke moravan aki empesaron a vinir a Yel değirmeni i kon eyos empesaron a konstruizirsen los apartamentos mostrozos i pahpahlis.

Yel değirmeni, entre los anyos 1900-1950, era un lugar komo kampanya ande se ivan los ke moravan en la partida evropea de Estambol.  Akeyos anyos, el bodre de mar de Yel değirmeni era una plaj de arena.

Los apartamentos vyejos de Yel değirmeni eran konstruidos de piedras i eran ornados de dekorasyones en el stilo art-nouveau. Los apartamentos de Yel değirmeni bivyeron asta oy, entre mientres, todas las kazas de tavla se derrokaron i se izyeron edifisyos de beton.

Yel değirmeni era el primer sentro de Estambol ande aviya apartamentos. Oy en dia es un sentro ande mora una populasyon bastante grande, un sentro simpatiko kon las kayes i balkones ornadas de rozas multikolor ke estan dando un aspekto limpyo.

Despues de Yel değirmeni vijitimos la eglisya grega Ortodoksa “Aya Eufemia”, la eglisya ermeniya “Surp Takavor”, dos eglisyas rikas de dekorasyones.

La statua del toro “Boğa heykeli” ke se topa en el sentro echa por el eskultor fransez “Izidor Bonheur” se izo por mostrar la fuersa de los Fransezes a los Almanes. En el anyo 1969, esta statua tomo su lugar en Kadiköy.

El sinema “Süreyya Pasha”, el hamam “Köçeoğlu” veramente lugares de ver ovras de arte.

Vijitimos la “All Saints” eglisya de los Presbiteryanos, la taverna de “Kocho”, la “Ayazma de Ekaterini” i munchos otros lugares. Fue un dia reushido i un dia yeno de kultura kon las eksplikasyones de “Mois Gabay”.

Para terminar el dia mos fuimos kon 15 personas a la patisseriya “Baylan”, ke es una patiseriya spesyal kon su istorya de 87 anyos, una patiseriya nostaljika. Tyene una valor de perla kon su kualita i sus dulsuryas perfektas.

“Baylan” tyene una istorya desde el anyo 1923.

En 1925 se avyo en “Karaköy”, en 1928 en “Beyoğlu” i en 1961 en Kadiköy. Mas despues en “Bebek” delantre la mar i en otros lugares.

Komimos “Kup Grillée”, bevimos kafe, avlimos de las enformasyones ke mos dyo Mois Gabay, riyimos, burlimos i terminimos el dia de alhad kon grande plazer.

Keridos Lektores, vos konsejo de azer un paseo kon Mois Gabay, vash a kedar muy kontentes.

Vos oguro una anyada mueva, kon sanedad, felisita i prosperita. Al vermos en la anyada mueva, 2019.

 

Siz de yorumunuzu yapın

Tüm Yorumları Görün