Las kreaturas ke djugan la aplikasyon TikTok estan resivyendo envitasyones a la violensia, kontra las personas de kolor i kontra los judyos. En mezmo tiempo estan meldando propagandas por los neo-nazis.
Las kreaturas estan viendo palavras komo ‘Todos los judyos deven de murir’, o ‘mataremos a los pretos’. Estas palavras ‘non sansurizadas’ estan permetiendo a las kreaturas de krear videos debasho de estos temas.
TikTok, fabrikado en China i utilizado en Los Etados Unidos por miles de kreaturas i tambien adultos, oy es la mas popular aplikasyon del internet.
Fin agora, TikTok no resivio dinguna advertensia (ihtar) por las palavras de odio (nefret) ke esta utilizando en sus propagandas.
‘Esta aplikasyon deve de ser anulada, ma malorozamente Facebook esta malmenajado, i esta permetiendo un refujio a los grupos neo-nazis’ esta diziendo Heidi Beirich, el direktor de (SPLC), Sentro de Leyes de Provedad en el Sur.
Algunas palavras estan amostrando el apoyo de esta aplikasyon a Atomwaffen, ke es un grupo violente de los Neo-nazis. Este grupo esta azyendo la propaganda de asasinar los judyos de los Estados Unidos.
‘Agora vamos a azer gerra kontra las razas’ es el nombre de un djugo en TikTok. La karikatura de un judyo amostrado komo un raton ambyerto, es una otra foto ke las kreaturas rankontran en TikTok.
Un video kontenyendo fotos de personas aziendo los saludos de los nazis esta dando el mesaje: ‘Tengo una solusion, una solusion final’ referandose al Olokosto.
TikTok esta munchas vezes amostrando el numero 1488, ke es el numero importante de los neo-nazis ke inkluye el slogan de los nazis ‘Sieg Heil’.
Las kreaturas estan suivando un video ke esta aziendo la propaganda de ‘Siege’, ke es el livro popular de los neo-nazis.
TikTok se unio kon la aplikasion Musical.ly en el mez de agosto del anyo 2017. El New York Times eskrivio ke TikTok es ‘la sola buena aplikasyon’ en el internet, ‘tanto las kreaturas estan kontentes de esta aplikasyon’.
‘Esta aplikasyon esta dirijando las kreaturas. No esto puediendo pensar mas negras kozas ke se puede meter delantre las kreaturas’ esta diziendo Berich. ‘Las kreaturas estan kompartiendo estos videos, i se estan riyendo a las shakas, ma estas shakas estan danyando las kreaturas, i los estan dirijando a los grupos marjinales’.
‘Mataremos...’no puede ser una shaka. Estas palavras son palavras de odio.
La opinion de munchos es ke ‘Esta aplikasyon deve de ser kontrolada o anulada sin peryer tiempo’.
