Pina Bausch avla kon las personas en baylando.
Tuve el mazal de ser prezente a la reprezentasion teatral i baylante inolvidavle NEFES (soplo) en el Teatro Muhsin Ertuğrul en Harbiye el 22-23-24 de Julio, 2010.
Inspirada de la luzya sivdad de ESTAMBOL, tuvo grande sukseso.
Kon su umor, “Nefes” mos izo sonreir i mos tresalio kon sus performansas perfektas, para prezentar i deskrivir la antigua i maraviyoza Estambol...
Phillipine Bausche vino al mundo en 1940 en Solingen. Mas despues, en Wuppertal serka de Solingen, utilizo el pseudonimo “PİNA” i fue onorada mondialmente kon su TANZTHEATER (TEATRO DE BAYLE).
No me olvido de su primera reprezentasion, “Mazurka Fogo, en muestra sivdad en 2006. “Las Sivdades i las Personas”; el sujeto era LIZBON.
Sus parientes, kon el ayudo de sus ermanos i eya mismo, dirijavan el restorante de un otel en Solingen.
Aya se ambezo a observar las personas, el instinkto ke los pusha a las konduktas fondamentalas.
La atmosfera del primer periodo de su vida, konsernando su chikez kon muzika i famiya, se paso unida i oroza. Portanto, la Gerra de 1939 tuvo sus konsekuensas i preparo la kualita de sus ovras reputadas.
Pina supo inspirar kon amistad i krear una vez alegria, una vez tristesa, ma munchas vezes lo komiko o absurdo.
La relasion de la esperansa i la realita es la yave de sus performansas proprias a si…
Kon la burs ke obtuvo de su pais, fue resivida en New York por George Balanchine i realizo ke el bayle klasiko se estava renovando.
Baylo kon los artistos reputados en la Opera Metropolitan.
Entre tantos premios resividos de diferentes paises, puedemos sitar: Commandeur de l’Ordre des Arts et des Lettres, 1991. Chevalier de la Légion d’Honneur, 2003.
Me izo pena ke este anyo en el spektakolo de la noche del 22 de Junio, Bausch no estava mas en la shena kon su grupo. Su vida topo fin el 30 de Junio, 2009. Pina Bausch se nombrara por ser una de las mas reputadas koreografas i bayladeras del siglo XX, kreando la fuzion (ke fue muncho imitada) del teatro radikal, el arte surrealisto, el drama seksual i el lenguaje del puerpo baylando.
Para Pina Bausch, todas las muzikas tienen la misma valor, tanto ke ekspresan sensasiones verdaderas.
