El borracho de dia de Kipur

Dora NİYEGO Judeo-Espanyol
20 Eylül 2018 Perşembe

Los ke vinieron a la Sinagoga noche de Kipur, vieron un ombre ke estava durmiendo en un kanton. La golor fuerte de alkol ke estava viniendo de su alrededor, los deranjo muncho. Un judio borracho en la Sinagoga en este dia santo? Munchos de los yahites disheron ke lo echen afuera de la sinagoga.

El Rav entro a la Sinagoga i se dirijo a su lugar. Kon un sinyal del Rav, se avriyo la arka i salyeron afuera los rulos de la Tora, aparejandolos por el servisyo de Kol Nidrei.

Enduna el borracho se alevanto de su lugar, suvyo los eskalones asta la platforma de la lektura elevada en el sentro de la Sinagoga, i anonso: “Ne’um attah horeita!”. Le parisyo al ombre ke es el empesijo de Hakafot en Simha Tora. El borracho konfundyo (karıştırdı) el momento el mas seryozo del anyo kon la okazyon la mas alegre.

El puevlo se aparejaron a echarlo de la Sinagoga kuando el Rav se alevanto de su lugar i disho: “Deshaldo. Para el, ya vino Simha Tora’’.

La noche sigiente, despues ke todos kortaron tanid, el Rav les konto deke el Rav Shmuel estava borracho una noche antes.

Un dia antes, unas kuantas oras antes de tomar tanid, Rav Shmuel oyo avlar de un judio ke no pudo pagar la kira de su kaza por unos kuantos mezes, i el proprietario de la kaza no lo estava deshando salir de su kaza antes ke page la kira entera.

 “No puedo permeter ke una famiya judia seygan prizonieros en Kipur”, disho Rav Shmuel.

Dia entero, se fue de puerta en puerta. Los judios de akeya maalle le dieron jenerozamente todo lo ke pudieron dar, ma dainda le mankava 300 rubles para pueder pagar la soma entera de la kira. De ande puediya topar otros 300 rubles en esta ora?

Pasando delantre de una taverna, vido a un grupo de mansevos de famiyas rikas, beviendo i djugando kartas. Enriva de la meza, aviyan metido buen karar de moneda. El mansevo ke iva ganar el djugo, iva tomar toda la moneda.

Rav Shmuel se aserko de los mansevos. Komo pueden estos judios bever i djugar kartas en una taverna, el dia el mas santo del anyo? Ma komo era su solo esperansa, Rav Shmuel se aserko de la meza i les konto a los mansevos la situasion de la famiya emprizonada.

Uno de los mansevos tuvo una idea. Iva ser muy divertido (eğlenceli) emborrachar a un judio relijiozo en dia de Kipur. Izo trayer un vazo grande de vodka i le disho a Rav Shmuel: “Beve esto i te va dar 100 rubles”.

Rav Shmuel miro al vazo de votka i a la moneda. El beve alkol solo dos vezes al anyo - en Purim i en Simha Tora. Ma no teniya otro remedio. Rav Shmuel alevanto el vazo i bevio el kontenido entero. “Bravo!” grito el mansevo i le dio los 100 rubles. “Ma esto no abasta” disho Rav Shmuel, “tengo menester de otros 200 rubles para pueder salvar la famiya”. “Un trato es un trato!” disheron los djugadores. “Sien rubles para kada vazo’’.

Duspues ke bevio otros dos vazos de votka i ke tomo dozientos rubles, Rav Shmuel salio de la taverna meneyandose. Se fue a la kaza del proprietario, i le pago la devda entera. La famiya judia lo remersiaron kon lagrimas en los ojos. Rav Shmuel se desido de irse direktamente a la Sinagoga. Si se iva ir a kaza por tomar tanid, no iva pueder oyer el Kol Nidrei.

“En Roshashana”, disho el Rav en eskapando de kontar, “rogamos kozas ermozas por el anyo en viniendo, oy en Kipur, izimos tanid porke el Dio mos pardone los pekados, en Sukot mos vamos a asenter debasho la Suka i vamos a komemorar lo ke Dio izo para protejar muestros antepasados kuando salieron de Ejipto, i despues, en Simha Tora mos vamos a alegrar. Ma Rav Shmuel ya esta en Simha Tora. Ayer la noche, kuando Rav Shmuel anonso el empesijo de hakafot en Kol Nidrei, esto no era un yerro. Para mozotros Kipur aviya empesado, para el ya era Simha Tora.

 

Siz de yorumunuzu yapın

Tüm Yorumları Görün