Segun las pruebas (ipucu) de los historianos, Christopher Colombus era Marrano

Dora NİYEGO Judeo-Espanyol
24 Şubat 2016 Çarşamba

Segun las pruebas (ipucu) de los historianos espanyoles, José Erugo, Celso García de la Riega, Otero Sánchez i Nicolás Díaz Pérez Colombus era un marrano.

Colombus, ke era konosido en Espanya komo Cristobal Colon i ke dizen ke es italiano, no saviya el italiano del todo. Colombus sinyo su testamento en el 19 de mayo de 1506, i metio sinko kondisiones kuriozas en su testamento.

Dos de sus dezeos son unos de los kostumbres judios. Su primer dezeo era ke una parte de su ganansia ke se de a los proves. El segundo dezeo era de apartar un montante para las dotas de las ijas proves. Tambien, desho un grande montante a un Judio ke bivia en la entrada del kartie judio de Lizbon.

En estos dokumentos, Colombus utilizo una signatura de puntos i letras ke se topa en las enskripsiones de los simeterios judios en Espanya. Tambien, Colombos les disho a sus ijos ke melden Kadish duspues de su muerte.

Colombus desho buen kadar de paras para ke su suksedores liberen la Tierra Santa.

Estelle Irizarry, profesora de linguistika en la Universidad de Georgetown, analizo la lingua i las eskriturias de mano ke Colombus empleyo en sus dokumentos , i topo ke esta lingua es Ladino. Ademas, en las tredje letras ke Colombus eskrivio de mano a su ijo Diego, Estelle Irizarry topo el biervo ebreo ‘b’ezrat Hashem’ (kon la ayuda del Dio). Los Judios relijiozos, oy en dia, dainda empleyan esta benediksion en sus letras eskritas a sus keridos.

En el livro de Simon Wiesenthal, ‘Sails of Hope’ (Viajes de Esperansa), Wiesenthal eskrivio ke el viaje de Colombus fue motivado por su dezeo de topar un refujio para los Judios ke fueron ekspulzados de Espanya. De la mezma manera, Carol Delaney, una antropologa en la Universidad de Stanford, dedusio (sonuç çıkarmak) ke Colombus era un ombre muy relijiozo, i ke su entision era de navegar (denizden gitmek) a Asia para obtener oro, para pueder tomar Jerusalem atras, i rekonstuir el templo santo de los Judios. En los dias de Colombus, los Judios se kreian ke Jerusalem devia de ser liberado, i el templo rekonstruido, para ke venga Mashiah.

Los historianos toparon una otra prueba (ispat). Colombus iva salir al viaje el segundo dia de ogusto del anyo 1492, ma komo akel dia eraTisha Be Av, Colombus empeso su viaje el dia suivante, porke akel dia es un dia triste por los judios, i por esta razon no es un dia konveniente para empesar un viaje.

El viaje de Colombus en realidad no es finansado por la reyna Isabel (komo todos lo kreen). Dos judios konversos, Luis de Santángel y Gabriel Sánchez, i un otro judio Don Isaac Abravanel (rabino i ombre de estado judio), le dieron17.000 dukados para ayudarle en el viaje. De mezmo, las dos primeras letras ke Columbus enbiyo de su viaje no eran a Fernando i Isabel, ma a Santángel i Sanchez, regrasiandoles por sus ayudas, i eskriviendoles lo ke enkontro en su viaje.

Este anyo es el 510’en aniversario de la muerte de Colombus. Kreygo ke todos se vana embezar la identidad reel de Colombus.