AKTIVIDADES DE HANUKA DEL MINIX SUADIYE KINDERGARDEN

Dora NİYEGO Judeo-Espanyol
30 Aralık 2015 Çarşamba

VIJITA A LOS VIEJOS DE OR-YOM En el anyo akademiko 2015-2016, el Minix Suadiye Kindergarten, en el Diya de Mitzvah, selebraron la Fiesta de Hanuka, en la asosiasion OR YOM. Todos los partisipantes de OR YOM resivieron a las kreaturas en aplodisandolas . Kon kantikas i bayles, todos endjuntos komyeron las komidas savrozas aparejadas en la kuzina de la asosiasion OR YOM.

VIJITA DE FIESTA AL RABINIKO Las kreaturas vijitaron el Grande Rabino Isak Haleva en su posto kon aktividades teatral sovre la fiesta de Hanuka. Kantaron dos kantikas dando el mesaje de pas i de alegriya de Hanuka. El inyeto del Rabi Leon Adoni, Alen Hasan,  se asento en la siya de su nono, i dio mesajes de Hanuka. El Grande Rabino envito las kreaturas a komer endjuntos. Antes de komer, todos endjuntos asienderon las kandelas de Hanuka.  Kuando el payaso (palyaço) entro a la kamareta kon balones, las kreaturas empesaron a gritar kon grande alegriya.

EL KONSER DE LAS KANTIKAS SEFARADIS EN LA SINKENA NOCHE DE HANUKA Kon la kontribusion del Munisipio de Beşiktaş i del Konsulato de Austria, i kon el suporte de la Sinagoga Hemdat Israel Sinagoga (HISVA), el konser ke se aparejo por el benefiko (yarar) del Minix Suadiye Kindergarten, se selebró kon grande entuziazmo. Kon el suporto del Prezidente de la Asosiasion de Proteksion por los Proves, Ceki Kazmir, la entrada fue adorada kon pinturas de famozos pintores sefardíS turkos. Las voluntarias de HİSVA, en la prezidensia de Floret Loya, aparjaron un fabulozo kokteyl kon ofresimientos (ikram) turko-sefaradis. El Grande Rabino, el Prezidente de la Komunidad Judiya, i munchos administratores, i prezidentes de las asosiasiones asistieron a esta aktividad. 


El Prezidente de HİSVA, Eli Arditi, remersio a todos los partisipantes, a los ke dieron apoyo (destek) a Minix Suadiye Kindergarden, i a los ke ayudaron a la realizasion de este konser. El Prezidente del Munisipio de Beşiktaş, el Avokato Murat Hazinedar selebro la fiesta de Hanuka de todos los judios ke se enstalaron en las tierras del Emperio Otomano, i envito a todos los partisipantes a alumar las kandelas de Hanuka en la selebrasion de la fiesta ke se va realizar en la Plaza de Ortaköy. Kon la partisipasion de todos los envitados, las kandelas de Hanuka fueron alumadas kon grande alegriya. Los elevos del kindergarden kantaron la kantika Ocho Kandelikas en la lingua Judeo-espanyol.

Duspues del konser de kantikas sefardís de los famozos kantadores Ronen Nissan i Claudia Gaurin, todos los partisipantes remersiaron al Munisipio de Beşiktaş, i al Konsulato de Austria, i les prezentaron una plaketa a kada uno. La administratora del Kindergarden, Doli Levi, meldo una poeziya ke Meir Gaon eskrivio por las kreaturas.

LA SELEBRASION DE LA FIESTA DE HANUKA EN LA SINAGOGA BET-EL DE CADDEBOSTAN
La selebrasion tradisional de la fiesta de Hanuka se realizo kon grande entuziazmo en la Sinagoga de Caddebostan, Bet-El, diya de Alhad, kon la partisipasion del Grande Rabino Isak Haleva, el Munisipio de Kadiköy, Aykurt Nuhoğlu, i el Prezidente de la Komunidad Judiya, Izak İbrahimzade. Los elevos del Kindergarten Minix Suadiye asistieron a la seremonia kon dos kantikas. Los parientes de las kreaturas, los amigos, i los miembros de la komunidad selebraron la fiesta kon grande alegriya i grande entuziazmo.