Un kavzo enteresante

Dora NİYEGO Judeo-Espanyol
2 Eylül 2015 Çarşamba

Traduizado de un artikolo de COLive

Antes diez diyas, un lavorante de un ospital de New York, lo yamo al Rabino Avraham Lider por un kavzo urjante.

-Ay una mujer aki ke kere avlar kon ti imediatamente. Su marido esta echado aki, en el ospital, i eya esta allado de el. El estado del ombre no esta bueno, i no se save si va pueder savlar. La mujer te esta rogando ke vengas aki, eya kere avlar kon ti.

El rabino desho su echo, i de punto, se fue al ospital. El hazino estava dezmayado, i atado a las makinas. La mujer, enkiyetada, estava asperando para avlar kon el rabino:

-Mi marido esta para murir. Ay vente i siete anyos ke estamos kazados. Yo so muslumana, mi marido es judyo, ma el no bivyo komo un judyo. Su dezeyo dalkavo es de ser enterrado komo un judyo.

Sin ke el rabino tenga tiempo para responderle, la mujer kontinuo:

-Rabi, oyeme, tengo echos urjantes ke devo de reglar, i amanyana kale ke me vayga a la Turkiya. Kuando mi marido se muryo, asigurame ke va ser enterrado komo un judyo.

El rabino, enkantado, le disho ke los judyos azemos planes por seremoniyas por Brit Milla, Bar Mitzvah, i bodas, ma no azemos planes antes ke un ombre se muera.

La mujer ensistyo:

-Si mi marido se muere antes ke yo torne de la Turkiya, te esto dando una letra ke te esta dando el derecho de enterrarlo sin ke este yo aki.

El rabino no puido konverserla kontra el dezeyo del ombre, i tomo la letra.

Kada diya, el rabino se estuvo indo al ospital, rogando al Dio allado del ombre, i avlando kon el mezmo ke el hazino no estava en si.

Entremientes, la mujer se fue a la Turkiya, arazgada entre su marido i sus ovligasyones.

A la sorpresa (şaşkınlık) de todos, el hazino empeso a sintirse mijor, i duspues de kuatro diyas, avyo los ojos.

Poko a poko, empesaron a kitarle todas las makinas, i lo transferaron a una kamareta regulye.

Kuando el ombre se esperto por entero, el rabino empeso a avlar kon el.

- Komo te yamas?

- Mi nombre ebreo es İtzhak.

El rabino se riyo;

- Dizeme, te plaze supa de gayina kosher?

- Si, me plaze muncho.

Duspues, el rabino le demando, si aksepta ke le meta tefillin enriva de los ombros.

- La vez dalkavo ke me metieron tefillin era en mi Bar-Mitzva. Agora tengo ochenta i kuatro anyos.

Al diya, el rabino vino al ospital de muevo, i le trusho supa de gayina.

Duspues ke el hazino eskapo de bever la supa, el rabino le metio el tefillin enriva de los ombros, i kon lagrinas en los ojos, el hazino disho la Shema kon el rabino.

El rabino lo aseguro ke el va estar pronto a ayudarle en todo, finke va tener sien i vente anyos.