Diya de Alhad, en el sentro de Paris, los lideres de sukuenta paizes, i mas de un milion i medyo de parizienes, izieron una demonstrasion kontra el terorizmo, i por onorar las diisiete viktimas de una seri de atakas.
Mas de sinko mil polises, i soldados fueron enkargados para prokurar la seguridad en la demonstrasion.
Esta demonstrasion fue yamada ‘La marcha kontra el odio (nefret)’.
Duspues de midi, a las kuatro de las oras, todas las kalejas i los bulvares, en el entorno de la Plaza de la Republika fueron serradas al trafik. De todas las direksiones de Paris, las personas estuvieron dirijandosen a la Plaza. Las estasiones de metro serka la Plaza, fueron serradas. Las famiyas de las viktimas, los politikos, los eskritores, los artistos arivaron kon kartelas en la mano, deklarando ‘Yo so Charlie’. Judyos, kristianos, muslumanes, personas de tdas las relijiones se reunieron en el mezmo lugar, por protestar el terorizmo. Todos endjuntos, kaminaron de la Plaza de la Republika, a la Plaza de la Nasion.
Todos vinieron por ekspresar sus sentimentos de inyervo, duspues de los tres diyas del shok ke pasaron.
El Prezidente de la Fransia, Hollande se adreso a los ministros, diziendo: ‘Oy, Paris es la kapital del mundo’.
El Primer Ministro de la Fransia, Manuel Valls, disho ke esta demonstrasion es ‘un grito de amor, de libertad, i de toleransia’.
Tambien el Primer Ministro de la Turkiya, Ahmet Davutoğlu, i el Primer Ministro de İsrael, Binyamin Netanyahu asistieron a esta reunion.
Netanyahu anonso ke las viktimas judiyas de la ataka al supermarket kosher, vana ser enterradas en İsrael, diya de Mierkoles.
El tema prensipal de esta demonstrasion fue ‘la nesesidad de gerreyar kontra el terorizmo.
Netanyahu disho ke el mundo deve unirse kontra kulasiker terorizmo, i deven de gerreyar todos endjuntos kontra el terorizmo, asta la muerte.
