Las atakas a los sitios judios en Ukrania

Dora NİYEGO Judeo-Espanyol
1 Mayıs 2014 Perşembe

Segun un artikolo ke meldi en el İnternet, las atakas i las amenasas a los judios de Ukrania, estan pujando de diya en diya.

Munchos sitios judios fueron vandalizados. Unos kuantos diyas duspues ke una Sinagoga fue bombardeyada, uvo muevas formas de violansia kontra los sitios judios. Un monumento komemorativo del Holokosto, i la tomba de un personaje emportante, fueron destruidos.

La Ajansia Telegrafika Judia (JTA) enformo ke el Memorial del Holokosto en Sebastopol, en la peninsula de Krimea, fue pintado kolorado, i metieron un martiyo i las letras USSR enriva. Este monumento fue konstruido en el anyo 2003, para komemorar el asasinato de 4200 judios por los Nazis, en el anyo 1942. En el pasado, este monumento fue vandalizado por los neonazis..

En Dnepropetrovsk, vandales pintaron swastikas kon spray, enriva la tomba de Dov Ber Schneerson, ke era el ermano del lider del muvimiento Lubawich, i tambien era Chabad.

El los diyas ke pasimos, el vice-prezidente Joe Biden, en una vijita a la ex-republika sovietika, les disho ke no ay lugar al antisemitizmo en Ukrania. ‘El antisemitizmo i la intolerensia no pueden tener lugar en la mueva Ukrania. Los Estados Unidos esta kondamnando las atakas i las amenasas kontra los judios’ disho Joe Biden.

En la konferensia de la presa, Joe Biden estuvo lado kon lado kon el Primer Ministro de Ukrania, Arseniy Yatsenyuk. En sus komantarios, Yatsenyuk no avlo diraktamente de las atakas kontra los judios.

Estas atakas de violansia empesaron del diya ke la revolusion empeso. Noche de Shabat, en la fiesta de Pesah, los vandales echaron dos molotov kokteyles a la prensipal Sinagoga en la sivdad de Nikolayev. Este evento se produizo a las dos de la media noche, kuando la Sinagoga estava vaziya.

La semana ke pasimos, miembros de la komunidad judia en Donetsk, en el este de Ukrania, enformaron ke tres ombres kon maskas en la kara, i bandieras rusas en la mano, distribuaron papeles a los judios afuera de la Sinagoga, diziendo ke todos los judios deven de rejistrar i deklarar sus bienes al governo separatista. El lider separatista pro ruso, disho ke el no esta detras de este dokumento ke fue denonsado por el governo de Obama.

Yatsenyuk prometio de azer apanyar los ‘bastadros’ ke estan detras de este akto, i de yevarlos a la justisia.