Yerushalaim i Estanbol estan entre las primeras sivdades turistikas

Dora NİYEGO Judeo-Espanyol
15 Eylül 2010 Çarşamba

Los lektores del popular website sitio ‘Trip Advisor’, klasifiaron Yerushalaim i Estanbol entre las diez primeras sivdades turistikas kon diferentes i enteresantes kulturas.

Trip Advisor es un sitio ke da profonda enformasion sovre los mijores luguares de viajar en el mundo entero. Los lektores de este sitio pueden topar kritikas de lektores, forumes, i konsejos de viaje.

Las diez sivdades turistikas klasifiadas por los lektores son: Floransa, Washington DC, Roma, Paris, Siem Reap (Kambochia), New York, Yerushalaim, Venesia, Estanbol, Londra.

El sitio ‘Trip Advisor’ esta entroduizando Yerushalaim i Estanbol kon las frazes suivantes:

‘Estanbol es situado entre Evropa i Asia. En esta sivdad enteresante, puedesh enkontrar mishkitas, eglizias, i marketes de siglos de antikedad, lado kon lado, kon restoranes modernos, galerias i klubes de noche. No vos olvidesh de vijitar un Hamam (tradisional banyo turko) ande en fregando el puerpo, todos los kueros suzios vana ser barridos. Tambien no neglijesh de vijitar el Palasio de Topkapi, el Muzeo de Ayasophia, i el Grande Bazaar’.

‘Yerushalaim – Pelegrinos relijiozos estuvieron viajando a Yerushalaim desde munchos anyos. La profonda sinyifikasion kultural i historika de esta sivdad es apresiada por todas las relijiones. Kale ver los prensipales monumentos, ma tambien kale deshar sufizante tiempo para kaminar las kayes estrechas, i ver la vida kotidiana de este lugar tan antiko. No neglijesh de vijitar el Muro de Lamantasiones, el Monte de Templo, i la Sivdad de David’.

En el mez Julio, el periodiko National Geographic klasifio Tel Aviv komo una de las primeras sivdades kon plajes manyifikas entre Barselona, Rio de Jenerio, Nice, i Cape Town.

‘Tel Aviv es el Miami Beach de la Mediterane. Esta sivdad kon sus plajes es la kontraparte del relijiozo Yerushalaim. Restoranes, diskos i klubes estan aviertos asta el amaneser en Tel Aviv. Durante el diya, se puede azer el paseo de la sivdad, i se puede kaminar al largo de las plajes’ esta diziendo el artikolo.