SEGUN RAV YAAKOV HILLEL, Los Judios Turkos

Dora NİYEGO Judeo-Espanyol
21 Ekim 2009 Çarşamba

La semana ke pasimos, el direktor de la Yeshiva Aavat Shalom, Rav Yaakov Hillel estuvo en Estanbol unos kuantos diyas. Komo lo savemos Aavat Shalom es una de las mas grandes Yeshivas del mundo. Hillel eskrivio munchos livros sovre la Kabala  i la Alaha.

Rav Yaakov Hillel es tambien el direktor de una kompaniya de publisidad ke arekoje los mas ralos manuskriptos relijiozos en el mundo entero i los publika en forma de livros.

En la Yeshiva Aavat Shalom, mas de mil estudiantes de nivel superior, estan estudiando el Talmud i la Alaha. Duspues ke eskapan la Yeshiva, estos estudiantes se van a munchas partes del mundo para dar la edukasion judiya a los mansevos. Los mansevos i las mansevas ke no tuvieron la oportunidad de ambezarsen el judaizmo estan asistiendo a estos seminarios. En esta Yeshiva, ay tambien raves viejos ke vienen para ambezarsen la Kabala.

Rav Hillel esta diziendo ke el tiene una grande admirasion por los judios turkos i por sus istoria, Segun Hillel, la komunidad judia de la Turkiya es la sola komunidad ke no peryo su paiz orijinal. En el mundo entero, komunidades judias de miles de anyos, peryeron sus paizes i fueron obligados a enstalarsen en otros paizes. La majorita de los judios de los otros paizes son vinidos de diferentes lugares. Ashkenazes, sefaradis, judios arabos formaron muevas komunidades en los paizes ke se enstalaron. Los judios turkos mentenieron sus lugar, sus tradisiones i sus enstitusiones por mas de kinyentos anyos.

‘Los mas grandes rabinos sefaradis’ esta diziendo Hilled, ‘los mas grandes eskridores relijiozos, los mas grandes Kabalistos, i los mas grandes lideres salieron de las komunidades judias de la Turkiya’. Segun Hillel, dainda ay munchos manuskriptos relijiozos en munchas bibliotekas, eskritos por los rabinos turkos. El esta bushkando estos manuskriptos para pueder publikarlos en forma de livros.

‘Oy, en el mundo, ay munchas revolusiones endustriales i sovre la teknolojika alta’ esta diziendo Hillel. ‘Si meldamos la Tora ke es eskrita miles de anyos antes, vemos ke oy mezmo, la Tora ke es el orgoliyo de los judios, es el solo livro ke inkluida enformasiones sovre munchas branches. La Kabala mos da un entendimiendo ondo sovre la filozofiya de muestra relijion, i los sekretos detras las reglas de la Tora, Los mansevos de oy, keren saver las razanes detras kada regla. Todos los semboles de la Tora tienen una eksplikasion. En ambezandosen mezmo los mas chikos detalyos de kada aksion, de kada mitzvah, los mansevos vana apresiar mas muncho la valor de la Tora’.

Komo esta diziendo Rav Hillel, la kontinuasion del judaizmo se puede prokurar kon el entendimiendo, el saverisio del Judaizmo, de muestras raizes, de muestras tradisiones ke son muestra erensiya presioza.