“Shalom Aleykum”

Dora NİYEGO Judeo-Espanyol
24 Haziran 2009 Çarşamba

El projekto de la Komunidad Judiya, ‘de konosorsen de serka kon la grande komunidad del pais’ fue la primera nuvela del periodiko turko Newsweek de esta semana.

La fotografia del Grande Rabino Rav. İsak Haleva kuvriyo la primera pajina entera de este periodiko. ‘Shalom Aleykum’ fue el titolo de este artikolo de sinko pajinas.

El primer paso de este projekto empeso kon el rankontro de los estudientes Musulmanes de la Fakultad de Teolojiya, kon los mansevos de la komunidad judiya, en la Sinagoga Neve Shalom.

Segun el artikolo, trenta  estudientes de la Fakultad de Teolojiya estuvieron suivando las lekturas del Profesor de Teolojiya, İsmail Taspinar, i de Rav. Yeuda Adoni, miembro de Bet-Din. Los dos ombres de relijion enformaron los oyentes sovre la vida relijioza i las orasiones de las dos relijiones. Los estudiantes Musulmanes lo estavan oyendo a Rav. Adoni kon grande kuriozita. Ambezarsen sovre la forma de vida i las tradisiones  de los miembros de la komunidad judiya,  ke biven kon eyos endjuntos enriva la mezma tierra, los entereso muncho. Munchos de estos estudiantes estuvieron dizyendo, ke es la primera vez ke se topan en una Sinagoga.

En la komida de midi ofrida a los envitados, los miembro de las dos komunidades diskutaron kon grande entimidad, sovre las orasiones i las tradisyones komunas de las dos relijiones. El sujeto ke los  entereso los mas, fue la Kuzina Djudiya, i las reglas de ‘Kasher’ de  los djudiyos kon las reglas de ‘Helal’ de los Musulmanes.

Dospues de la komida, los envitados vijitaron todos endjuntos ‘El Muzeo Judiyo del 500’ien Anyo’.

Los rankontros de los miembros de las dos relijiones vana kontinuar en los diyas suivantes, en la Sinagoga de Neve Shalom.

El Grande Rabino İsak Haleva lo resivio al gazetero de Newsweek en su posto en el Rabinato. Durante esta entrevista, el Grande Rabino le konto de sus eksperiensas de onze anyos, komo profesor de los estudiantes Musulmanes, en la Fakultad de Teolojiya, i le avlo sovre los problemas de la Komunidad Judiya de muestro pais.