Seremonia de Hanuka en ‘White House’

El Lunes ke pasimos, el Prezidente George Bush, duspues ke torno de su viaje de ‘Adio’ a Irak i Afganistan, organizo una seremonia de Hanuka en ‘‘White House’’, para los lideres judios

Dora NİYEGO Judeo-Espanyol
24 Aralık 2008 Çarşamba

En esta seremonia, la vieja Hanukia, ke el primer Primer Ministro de İsrael, David Ben-Gurion, la aviya echo regalo al viejo Prezidente Harry Truman, fue asendida por los inyetos de estos dos ombres valorozos.

El Prezidente Bush, les disho a los envitados, ke el, korto su viaje para asistir a esta seremonia de Hanuka. “Teniya de toparme kon el Prezidente de Afganistan, ma le dishe ke devo de tornar a ‘‘White House’’, por un evenemiento emportante” disho Bush. “La resepsion de Hanuka es siempre uno de los mas emportantes evenemientos de esta sezon. Laura i yo, mos estomos sintiendo onorados de reunirmos kon los dirijentes de la komunidad judia, por selebrar muestra Hanuka dalkavo en ‘White House’.”

“La istoria de Hanuka, mos akodra la viktoria mirakuloza de un grupo de patriotos, kontra el despotizmo, i la azete ke kemo por ocho diyas’ disho Bush. ‘Durante siglos de egzilio, los judios kontinuaron a asender la Hanukiya. Kada anyo, kon grande gusto, kontamplaron su briyo; la asienderon kon sus kreensia en el pueder del Dio, i kon sus amor al mas grande regalo ke el Dıo les dio - la liberdad”.

“Esta Hanuka estomos selebrando una otra viktoria - el sesenten aniversario de la fondasion del Estado de İsrael. Kuando el Prezidente, Harry Truman, rekonosio İsrael, en el Mayo del anyo 1948, munchos se demandaron si esta nasion va pueder bivir. Ma, de los primeros diyas de la İndependensia, el puevlo de İsrael, los izo enkantar. Kon desizion i kon lavoro duro, los İsraelianos reusheron a konvertir un dezerto a una tierra fertila. Los İsraelianos fondaron una demokrasia developada, una ekonomia fuerte i una de las mas puederozas fuersas militarias del mundo entero. Oy dainda, komo los Makabeos, İsrael esta kontinuando a defendenderse kontra sus enemigos ke keren destruirla. Oy, İsrael es una luz enriva las nasiones, i uno de los mas serkanos amigos de la Amerika”.

La semana ke pasimos, en uno de sus deskorsos en el Sentro Saban en Washington, Bush izo un rezumen de sus politika kon el Oriente Medio durante su administrasion, ke es una rejion muy emportante por los Estados Unidos. Su administrasion, disho Bush, kontinuo siempre la bushkida de seguridad, pas i prosperidad en el Oriente Medio.

Segun Bush, el problema el mas grande, ke es el konflikto Palestiniano-İsraeliano, kon los eforsos de su administrasion, oy gano el mas grande  consensus (fikir birliği) enternasional. Kon el proseso Anapolis, se empeso un kamino, ke se va eskapar kon la solusion de dos estados, finalmente realizados. Ansi, el Oriente Medio, va serrar una epoka de obskuridad, i va empesar una mueva epoka de posibilidad i de esperanza. El diya es serka, kuando los Estados del Oriente Medio, vana bivir unidos kon akordos de diplomasia, de turizmo, i de komerso. El diya es serka, kuando los teroristos vana entender la injustisia del terorizmo. Si prezervamos muestra kreensia en estos ideales, esta vizion se va pueder konvertir en realidad.