Angela Merkel Arivo A Israel Kon Su Delegasion

Dora NİYEGO Judeo-Espanyol
19 Mart 2008 Çarşamba

El primer Ministro de Alemania, Angela Merkel arivo a Israel, diya de Alhad, el 16 de Marso, por una vijita ofisial.

Duspues ke fue resivida kon su delegasion al aeroporto por el Primer Ministro Ehud Barak, Angela Merkel vijito el Kibbutz, Sze Boker. El 17 de Marzo, Merkel vijito el Memorial del Holokosto, Yad Vashem. Diya de Martes, Merkel va adresar la palavra a los Ministros en el Knesset.

Durante su vijita, Merkel se va reunir tambien kon el Prezidente Shimon Peres, kon el Ministro de Relasiones Eksteriores, Tzipi Livni, i kon el Prezidente del Partido Likud, Benjamin Natanyahu.

En el aeroporto, Ehud Olmert la resivio kon estos biervos; ‘’El Estado de Israel esta muy kontente de hospedar el Primer Ministro de Alemania, en el 60ien aniversario de muestro paiz. Alemania es uno de los mas fuertes i de los mas emportantes aliados de Israel. Arivatesh a Israel kon la entision de establisir un dialogo de konsulta por fortaleser i profondizar la kooperasion entre los dos paizes. Vos esto remersiando del fondo de mi korason, por vuestra amistad, i por vuestro entendimiendo profondo por muestra politika i muestras nesesidades de seguridad’’.

“En los anyos dalkavo, las relasiones entre muestros paizes se developaron en munchos kampos. Alemania es  muestro segundo sosıo-komersial partener. Muestras relasiones en los kampos de la siensia, la kultura i la ekonomia son prodaktivos i muestra kooperasion en las arenas de politika i seguridad es, komo siempre, serkana i korajoza. La politika de Alemenia es karakterizada kon su entendimiendo djusto i pozitivo, siendo kontra el terorizmo’’.

‘’Las selebrasiones aparejadas en vuestro paiz por el 60ien aniversario de Israel, i vuestra vijita a muestro paiz en este momento historiko, son una klara ekspresion de vuestra amistad personal, i de la emportansia ke datesh a las relasiones entre los dos paizes’’.

“En mi nombre i en nombre de mi puevlo, vos remersio de muevo, por vuestra desizion de vijitar muestro paiz’’.

Duspues de la seremonia de la bienvenida, Angela Merkel tomo la palavra:

“Vos remersio muncho por la kayente resepsion aki en Israel. Los dos paizes lavoraron muncho i se esfuersaron par garantizar el futuro de las relasiones entre muestros puevlos. Estas relasiones son evidente, i por esta razon, amanyana, vamos a vijitar la tomba de Ben Gurion, ke, kon Konrad Ademaiver establisaron las relasiones entre Israel i Alemania, i lavoraron para enfuerteserlas’’.

“Esto agradesida ke, endjuntos, vamos a avrir una mueva oja, i vamos a ampesar kon las konsultas entre muestros governos. Alemania tiene una responsabilidad historika por Israel. Endjuntos, vamos a aparejar muevos projektos para ameliorar el mundo - para establisir la pas, la libertad, i la kooperasion en el mundo entero’’.

“Somos konsientes de las amenzas (tehdit) ke Israel se enkontro en los sesenta anyos ke deshimos atras. Mos va gustar de kontribuir a la solusion de konflikto en el Medio Oriente. Vamos a kontinuar estas relasiones, en un esprito de amistad’’.

“Vos esto de muevo remersiando por la kayente bienvenida, vos esto felisitando por el 60ien aniversario, tambien vos esto transmetiendo las felisitasiones de mi delegasion, del puevlo aleman, i de mi, personalmente’’