OLOKOSTO

İsak ESKİNAZİ Judeo-Espanyol
26 Ocak 2022 Çarşamba

El 27 de Enero es el diya enternasyonal de komemorar la matansiya de los Djudyos por los Almanes Nazis. Porke en 1945, las armadas de la Unyon Sovyetika entraron este mismo diya al desgrasyado kampo  “Auschwitz-Birkenau”, kampo de konsantrasyon i de eksterminasyon  en Polonya. En la istorya  de la umanidad, afitaron munchas trajediyas ama no eran tan grandes komo esta. Una matansiya sistematika, organizada por un  Estado,  eksterminando sesh milyones de Djjudyos, ombres, mujeres, kriyaturas solo por ke eran  Djudyos, i mas milyones porke eran Zinganos, omoseksuales o sin kapasidad entelektual o fizika.  La matansiya fue akseptada no solo por este mizmo Estado, ma i por las nasyones ke kolaboraron kon eyos.

Los Alemanes yamaron esta matansya: “La Solusyon Final de la kestyon Djudiya”. Mozotros  la yamamos el “Olokosto” o la “Shoa”; palavra ke fue empleyada después de la destruksyon de Yerushalayim por Babilonya en el siglo 6 antes de muestra era, i la segunda destruksyon del Bet aMikdash en el anyo 70 de muestra era, por los Romanos. La palavra Olokosto vyene del Grego “holokauston”, ke kere dizir el sakrifisyo kemado ofresido al Dyo, komo los puerpos muertos de los Djudyos ke fueron konsumidos en los ornos  krematorios. La palavra olokosto tiene la misma raiz kon la palavra “hipokosto” ke kere dizir el orno ke da el ayre kayente del banyo romano.

HIPOKOSTO

Kuando los Rusos entraron al kampo, enkontraron 7000 prizoneros ke pudieron sovrebivir a la vida de gehinnam ke tuvieron en este kampo. Siguro ke la palavra "Olokosto” o “Shoa” no viene solo de este kampo, porke mas de sinko milyones de Djudyos fueron matados de otras maneras komo la ambre, el mal tratamiento, i lo mas triste, matansiya en seria kon armas en esta gerra de la lokura de Hitler. Así es el 27 de Enero 1945 ke fue akseptado komo diya de komemorasyon de la Shoa según la deklarasyon no 60/7 de  la Asamblea de las  Nasyones Unidas, según esta deklarasyon, las Nasyones deven de ensenyar el Olokosto para evitar ke no se pueda repetir en el futuro.

Lo mas de las nasyones observan este diya komo diya de komemorasyon, ama Israel i los Djudyos en la diaspora, lo observan el diya de “Yom aZikaron”, ke vyene antes del “Yom aAtsmaut”. A mozotros  mos keda de dizir para siempre: “NUNKA  MAS”

 

Siz de yorumunuzu yapın

Tüm Yorumları Görün