La piedrita de muestro amigo, Henri Çiprut

Silvyo OVADYA Judeo-Espanyol
15 Aralık 2021 Çarşamba

Noche de Shabat, despues de 20 mezes, por la primera vez, mos fuimos a la kaza de mi ermana. Asperando mi mujer, delantre de muestra kaza una amiga me telefono dizyendome ke en la media elektronika meldo la muerte de Henri Çiprut. I me demando si una koza asemejante era posivle. Le dishe ke no savia i serri el telefon. Avia unos kuantos mezes ke estava al koryente de la hazinura de muestro amigo, Henri. I unas kuantas vezes avlimos en el telefon. Estava korajozo i yeno de esperansa. Despues ke me konto su situasyon, estava demoralizado. Doktor no so, de melisina no m’entyendo ma a lo ke me avia kontado, la situasion no estava briyante. Despues le mandi unos kuantos whatsappes. I es kon su padre Daniel ke avlimos i ke mos mandimos mesajes de whatsapp. Me telefono para demandar ande puediya topar remedios de medisina para salvar la vida de su ijo. Avli kon un amigo Profesor en este kampo para demandar si avia remedyos en Israel o en otros payizes. Avlaron unas kuantas vezes el Sinyor Daniel kon mi amigo; i ya se ke fue operado una otra vez. Nada no sirvio para salvar su vida. Una madre i un padre i kreo una mujer ke izyeron todo lo ke podiyan; ma no reusheron a salvar la vida de Henri.  Despues de tantos esforsos, esto fue el destino.

   Ken era Henri Çiprut? Malgrado ke no tenia ni 50 anyos, lavoro mas de vente anyos en el Şalom i en el Sentro de la Kultura Sefaradi. Ya se ke era uno de los fondadores del sitio d’internet, Avlaremos. Henri era un mansevo ke kritikava munchas kozas, munchos evenimyentos i munchos aktos. Ma savia propozar una solusyon para rezolver el problem. Es una semana despues del Dia Internasyonal del Ladino ke realizimos kuatro anyos antes ke organizimos una reunyon para diskutir lo ke izimos. I Henri mos kritiko buen karar i propozo munchas kozas muevas ke puediamos azer. I lavoro seriozamente un anyo entero para tener una reushita emportante kon djugos, kompetisyones, kon kansyones… Un anyo despues kon la korona, organizimos un Diya en el Zoom. De muevo tomo un rolo emportante en esta aktivitad. Entre tyempo lavorimos kon Henri i Karen para tener un Sitio d’Internet mas aktivo. I kon estos trokamyentos, vendimos buen karar de livros a las Amerikas, a los payizes Evropeos i a Israel. Devo de atorgar ke no supo los rezultados del echo para kual mos ayudo buen karar. Mizmo demando tanto a muestro amigo ke mos preparo el program en el internet ke me telefono demandandome si reelmente devia de azer esto todo. I a la fin tomimos el kamino den medio.

   Antes de eskrivir este artikolo estava sorfeando en el YouTube i vide tres o kuatro filmos ande Henri Çiprut era entrevitado en Judeo-Espanyol. Tenia el koraje de avlar. I keria ke su ijo Daniel se ambeze esta lingua.

  Tenia una grande admirasyon para la lingua i kultura Franseza; tenia una admirasion asemejante para la lingua Judeo-Espanyola i para la Kultura Sefaradi.

   Unas kuantas oras despues de su disparision, los dirijentes de muestra komunidad dyeron karar de fondar un fondo de Edukasyon al nombre de Henri Çiprut. Reelmente fue un akto ke se devia de aplodisar. El Sentro Sefaradi dyo karar de organizar el Diya Internasyonal del Ladino ke se va realizar el 27 de Febrero 2022 a la Memoria de Henri Çiprut.

  Diya de Alhad en el Simeterio Djudio de Kilyos una grande djentorya partisiparon a la seremonia de funerales de Henri. Reelmente fue la mas grande djentorya ke vimos los dos anyos dalkavo.

   Henri, ke tu alma repoze en Gan Eden!

Siz de yorumunuzu yapın

Tüm Yorumları Görün