ES KE LAS MAESTRAS ESTAN REUSHANDO A GANAR SUS DERECHOS?

Dora NİYEGO Judeo-Espanyol
24 Kasım 2021 Çarşamba

En el anyo 1933, kon la propozisyon del direktor jeneral del UNESCO, Federico Mayor, el sinko de Oktobre fue akseptado komo Diya de Maestras en el mundo entero. Ma agora, en munchos paizes, este diya se esta selebrando en diferentes datas. En la Turkiya, kon la propozisyon de Atatürk, el ventikuatro de Novembre fue fiksado komo Diya de las Maestras.

En este diya, el mas ermozo mesaje ke una maestra kere resivir es: ‘Estamos apresiando tus esforsos!’. Ma malorozamente, en dingun lugar en el mundo, este mesaje no se esta repetando muncho.

El objektivo del Diya de Maestras es de stimular los governos i el puevlo, por la nesesita de developar las kondisyones de lavoro de las maestras i de elevar sus status en la sosiedad. Las maestras estan aziendo munchos eforsos para aparejar una jenerasyon pronta a los rapidos trokamientos de la vida de oy.

Las maestras son las ke dan la formasyon a los elevos. Si pensamos ke un elevo pasa los tres kuartos de un diya en la eskola, puedemos entender ke karar de grande es el efekto de las maestras en su developamiento. Los mas emportantes modeles en la vida de los elevos son las maestras.

El dover de una maestra no es solo de ensenyar, ma es tambien de formar la vida de los mansevos kon grandes objektivos i esperansas.  Edukar es espander los orizones de los mansevos, mobilizar sus intelekto, i ensenyarles a pensar djusto. En edukando, una maestra aze munchas kozas en mezmo tiempo. Ensenya, orienta, inspira, ayuda al progreso akademiko, sosyal i emosyonal de sus elevos. En azyendo ganar a sus elevos buenas kualidades, una maestra pena para ke sus elevos se apersivan de sus talentos i ansi, ke ganen konfiensia. Determinar objektivos en la vida, krear muevas kozas, ser reushido i lo mas emportante, ambezarles a gerrear kon los problemes ke enkontran en la vida, son tambien los doveres de una maestra. En resume, una maestra ayuda sus elevos a ser armados para pueder avrir las puertas de una vida mijor. Kada diya, los edukadores estan bushkando muevas teknikas para pueder arivar a este objektivo de la mijor manera.

Oy, las personas deven de ambezarsen muevas kozas kada diya i developar sus talentos para pueder alkansar a los trokamientos kontinuales de la teknolojiya. En los anyos dalkavo, la edukasyon i la ensenyansia trokaron de sinyifikasyon. Antes, ambezar era solo en las eskolas; oy en diya, ambezar esta kontinuando durante la vida entera. Kada uno de mozotros, tenemos menester de ser estudiantes kada diya porke estamos en una epoka de enformasyon. Los medios de komunikasyon mos estan prokurando todo modo de enformasyon. El kargo de las maestras esta ogmentando de diya en diya. Kada diya, los edukadores estan bushkando muevas teknikas para pueder arivar a este objektivo de la mıjor manera. Las maestras estan partisipando en kursos para developar muevas metodes de ensenyansia, para ambezarsen las novedades de la teknolojia i las muevas metodes de edukasyon. Eyas mezmo se estan aziendo elevas para pueder alkansar a la reforma de edukasion.

 Oy, mas de siempre, las maestras tienen menester del apoyo i del protejo de los governos i del puevlo para pueder sostener el kargo de estas responsabilidades... 

Esperamos ke esta profesion, ke es tan respektada en el mundo entero, va elevar su status, va ganar mas muncho prestijio, i ansi, en el futuro, las maestras van a  reushir a ganar sus derechos, i a tener mas mijores kondisiones de lavoro i de vida.

 

Siz de yorumunuzu yapın

Tüm Yorumları Görün