Hag Pesah Sameah

Silvyo OVADYA Judeo-Espanyol
24 Mart 2021 Çarşamba

   Keridos lektores! Esta semana vos va kontar sovre el muevo proyekto ke la Fondasyon del  Museo Djudio de Turkiya esta realizando. Anyos antes en 2008 un livro fue publikado por el Şalom. Era un sonyo para mi. Avia avlado de este proyekto al famozo fotografo İzzet Keribar. I reelmente lavoro anyos para realizarlo. Kuando desidyeron ke kalia eskrivir la istoria de las sinagogas fotografiadas, Naim Güleryüz fue el adreso nesesaryo. I el livro fue una reushidad. Ma kreo ke el livro no fue imprimido bastante. Efektivamente la edision en turko se eskapo en poko tyempo.

   Antes ke fue elijido prezidente a la fondasion del Museo, el presidente Avi Habib i su ayudante en los echos ekonomikos kijyeron azer una segunda publikasyon de este livro en Turko. I reelmente me ayudaron i fueron los pionaryos de este proyekto. Ma vimos ke avia munchas sinagogas ke fueron restoradas o ke se estavan empleando para un buto diferente. I muestro maestro İzzet Keribar empeso a fotografiar todas estas sinagogas i el istoryano Naim Güleryüz eskrivyo la mueva situasyon de estos edifisios. En unas kuantas semanas vamos a eskapar la edisyon turka del livro. Espero ke va ser un evenimyento la presentasion del livro. I vamos a organizar una ekspozisyon kon estas fotos,  afirmando el livro por los ke krearon estos livros (es dos volumes).

   Ya se ke en Espanya estan fondando o fondaron un muevo Muzeo Djudio; i keren ke lavoremos endjuntos. Kreo ke esta ekspozisyon ke va reflektar las sinagogas de muestro payis va ser el primer eskalon de muestra kolaborasyon. Bivir i ver. Puedeser despues de la Espanya, esta ekspozisyon va ser ekspozada en otras sivdades del mundo. Puedeser en Londra, puedeser en Nueva York. Sivdades ande se topan Djudios orijinarios de Turkiya.

   Ya se ke esta semana la pajina de Judeo-Espanyol esta bastante kargada. Por esta razon devo de eskrivir kurto mi artikolo. Ma antes de eskapar mi artikolo vos auguro un Pesah yeno de alegria mizmo si estarash solikos en kaza. I esperamos ke este Pesah va ser el dalkavo Pesah ande las famiyas son dispersadas en kazas diferentes. Estan fiestando la fiesta puedeser en el zoom. Reelmente mos da pena este modo de fiestas.

   Hag Pesah sameah.

Siz de yorumunuzu yapın

Tüm Yorumları Görün