KENAN Cruz Çilli
Keridos meldadores, komo ya savesh en los ultimos diyas resivimos munchos haberes buenos
ke mos estan amostrando ke el proksimo anyo va ser un anyo mas trankilo i mas sano ke el
dalkavo. Kale ke seamos optimistos kon los haberes de vakunas kontra el kovid ke paresen
tener una reushidad muy alta. Klaro ke dainda es temprano de mas para planear el muevo anyo i el periyodo despues del koronavirus, ama oy keriya eskrivir sovre un lugar muy maraviyozo ke puede ser un lokal perfekto para los primeros viyajes despues ke se eskape esta maldicha pandemiya. Oy va eskrivir sovre la sivdad antigua de Patara, ke se topa en la provinsya de Antalya, serka de Kaş.
Siguro ke este anyo ya oyitesh muncho sovre Patara. En el empesijo del anyo el prezidente de la republika deklaro ke 2020 iva ser el anyo de Patara. Ansina, fueron planeados munchos
eventos i aktividades en la sivdad antigua. Kon esta deklarasyon, tambien empesaron lavoros
duros para restorar varias partes de la sivdad, komo el teatro antiguo i el Faro de Neron ke
tyene kaji dos mil anyos. Malgrado la pandemiya terrivle ke mos afito este anyo, los lavoros en Patara no pararon. I en los ultimos diyas, afilu vimos ke ya se organizaron konsyertos
manyifikos en el teatro de la sivdad. Espero ke en los proksimos mezes, todos los lavoros
jeniyales en Patara van a kontinuar, i ke kon tyempo mas i mas turistos van a tener la
oportunidad espesyal de vijitar a esta sivdad maraviyoza.
Una de las razones ke Patara es konsiderado un lugar uniko no solo en la Turkiya, ama
tambien en el mundo entero es achakes de su lokasyon. Patara se topa en el bodre del
Mediterraneo al lado de una naturaleza inkreyivle. La zona entera es un park natural ke
esta sovre la proteksyon del estado. Aryentro de este park ay una plaj maraviyoza kon dunas de arena ke paresen una otra planeta. Es aki ke las tortugas de mar (caretta caretta) vyenen a deshar sus guevos kada anyo. Estos elementos naturales, endjuntos kon las karakteristikas istorikas i kulturales de la sivdad, azen una armoniya muy luzya ke todos reelmente tyenen menester de sintir. Entonses vamos todos markar en muestros kalendaryos ke en los diyas sin kovid, kale vijitar esta parte majika de muestro payiz. Ama antes de todo tenemos ke ser pasyentes unos kuantos mezes mas. Sanos i rezyos ke estesh!
