NOMBRES JUDYOS EN EL KABINET DE BIDEN

Dora NİYEGO Judeo-Espanyol
2 Aralık 2020 Çarşamba

Ron Klain, elejido por Biden komo sekretaryo jeneral de White House, anonso ke en los proksimos diyas se va revelar los nombres de los ministros ke van a formar el kabinet de Biden. Ron Klain tambien afirmo ke aunke la administrasyon de Trump metyo obstakulos, la administrasyon de Biden se esta aparejando para la seremoniya de djuramiento ke se va realizar, de akuerdo kon las kondisyones de la pandemiya, en Enero vinyen.

Segun Bloomberg, Biden nomino Anthony Blinken komo Ministro de Relasyones Eksteryores. Anthony Blinken era el konsultor de seguridad nasyonal en el Kabinet de Obama. Blinken tambyen sirvyo komo Visministro de Relasyones Eksteriores en el governo de Obama. Blinken es ijastro de un judyo ke era un sovrebivente del Olokosto. Blinken enfatizo la sensibilidad de la futura administrasyon por la seguridad de Israel. Anthony Blinken afirmo ke, del punto del poder militar de Israel, la mueva administrasyon va revizar el akuerdo para vender armas a los Emiratos Arabes Unidos.

"Las lisyones ambezadas del Olokosto son la baz del apoyo i de la seguridad del visprezidente en la larga vida politika de Israel", aviya dicho mas antes Blinken sovre Biden.

Michael Oren, el eksambasador de Israel en Washington, konfirmo estas palavras i ekspreso ke Biden es un verdadero amigo de Israel. La repuesta de la kongresista de orijen palestino Rashida Tlaib a esta notisya, fue ke esta esperando ke Biden no va obstakulizar sus kritika al primer ministro israeli Benjamin Netanyahu i a sus politikas.

Estan asperando la konfirmasyon del Senado para ke la administrasyon de Blinken empese a lavorar.

Segun la prensa de los Estados Unidos, estan asperando ke Janet Yellen se va azer la Ministra del Trezoro del muevo kabinet. Si esta nominasyon se realiza, Yellen va ser la primera mujer en la istoria ke va okupar este posto. Yellen, ekonomista eksperimentada i eksperta en el merkado del empleyo, fue la primera mujer prezidenta del Banko Sentral FED en 2014. Janet Yellen es de una famiya judiya Poloneza. Yellen se engrandesyo en Brooklyn, New York. 

Biden elijyo Alejandro Mayorkas, de orijen judyo latinoamerikano, komo Ministro de Seguridad Interna. “Alejandro Mayorkas es el primer latinoamerikano emigrante nominado para servir komo ministro de seguridad interna”, disho Biden en su anononso. "Mayorkas tyene una karyera de 30 anyos komo avokato nasyonal en el sektor privado”. Alejandro Mayorkas es nasido en Kuba. El muevo Ministro de Seguridad Interna es de un padre judyo kubano i de una madre judiya de Romanya. La madre de Mayorkas era una de las sovrebiventes del Olokosto. Los padres de Mayorkas emigraron en primero a Kuba, i despues de la revolusyon, a los Estados Unidos. "Me engrandesi kon el sentimento de inseguridad" disho Mayorkas.

 

Siz de yorumunuzu yapın

Tüm Yorumları Görün