Alhad pasado tuve el plazer de asistir a la boda de “Ronit & Vedat” Paçacı en Neve-Shalom. RONİT, ija de “Ester & Albert Asa” kon VEDAT, ijo de “Vivet & Mando (z"l.) Paçacı estavan komo dos andjelikos.
A kavza de este virus mortal “Corona”, aviya kaji mas de sesh mezes ke no aviya bodas en esta sinagoga majestuoza. Veramente me sinti una persona privilejyoza, porke aviya solamente 150 personas en esta sinagoga de 550 personas. A la entrada mos miraron la kayentura para ver si estamos hazinos…
El kal estava ornado de flores blankas, las siyas muy byen duzudeadas kon fyongos blankos. Aviya kipas para los ombres i maskas para las mujeres. Todos kon maskas a no pueder konoser el den frente. En un rango una siya vaziya dos siyas atadas kon kordelas de saten blanka ande no se puediya asentar i el salon entero en esta forma.
En las siyas vaziyas ande mos asentimos una ridomika de kolonya de limon entornada de un buketo de rozas i un masapan en forma de korason muy fino. Se vido ke se aplikaron para ke seyga muy ermozo. Enriva los nombres de los novyos eskritos i remersyandomos.
Por empesar el Grande Rabino “Rav İzak Haleva” entro al salon i todos lo resivimos en pyes. En primero el novyo entro kon la madre, de detras el ermano kon la mujer…
La madre del novyo muy simple i muy ermoza estava saludando a todos kon su riza kayente.
Una muzika maraviyoza muy sentimental. Despues de 10-15 puntos la madre de la novya entro kon el ijo. Eya alta, ermoza muy byen vistida i muy emosyonada.
Enfin kon la muzika la novya en el braso del padre aparesyeron en la puerta. Un fostan maraviyozo, Ronit, una ijika tan luzya dike paresiya a un pasharo bolando. Eya alta, ermoza, dulse, kultivada, una ijika ke tyene la responsabilita enriva sus ombros.
Siguramente ke i el presidente de muestra komunita, İshak İbrahimzadeh asistyo a esta boda. El no manka de azer onores a todos.
El Rav. İzak Alalu kon su turko perfekto ekspliko lo ke es la union de dos mansevos, la emportansa de kreer una famiya, la tolerensya entre los dos i el amor, la kerensya ke no se deve de terminar toda la vida, mizmo en los momentos difisiles. Despues de su avla el Grande Rabino Rav. İzak Haleva tomo el aniyo i lo metyo al dedo de la novya. El haham “Natan Siliki” kon su boz de seda empeso a orasyonar. Lo ke estava ermozo en esta boda todos los hahames orasyonaron uno de detras de otro.
El tiyo de la novya el haham Jak Pardo, el Rav. İzak Peres, el Rav. David Sevi, el haham “Natan Siliki”… Dike paresiya una banketa, un pranso de bozes ermozas ke mos emosyono fina aryento el korason.
Kuando se termino la boda todos en la Teva embiyandomos bezikos i meneyando las manos por saludarmos i mozotros de la mizma manera, porke no aviya felisitasyones a kavza de este virus. Asistimos kon muestra prezensya i de enfrente, sin abrasos, sin bezos. Komo de tyempo ke vinimos?
Ma kale dar loores a todo, i mos vamos a ambezar a bivir este modo, mas simple, sin hadras i baranas, entre mozos, sin salir muncho, sin kaminar, abasteser a los menesteres… Espero ke vamos a pasar estos momentos sin sar i sin mal kon sanedad.
Antes de terminar, kero felisitar las famiyas “Asa” i “Paçacı” kon los novyos “Ronit i Vedat”. Vos sueto una vida kon sanedad, reushidad i muncha felisidad…
