Pasimos muevamente las fyestas Rosh-Ashana i Kipur.
Rosh-Ashana es un prinsipyo de una anyada mueva ke kontyene muevos ideales, muevas reushidades, muevos problemes kon muevas solusyones, i lo mas emportante, muevas relasyones kon muevas amistades.
Kada prinsipyo es una esperansa. Ke seya una anyada kon un avenir muevo i valorizaremos muestra vida verso los preseptos de muestro Dyo.
Kero avlar un poko de las uzansas de Rosh-Ashana.
Por egzempio, en las dos noches de Rosh-Ashana, kuando se vyene del Kal a kaza, se dize el Kidush. En primero se kome el dulse de mansana ke sinyifika ke este anyo muevo va ser dulse del empesijo fina la fin.
La prasa semboliza los enimigos ke keren muestra maldad, ke se despareskan.
La espinaka es el simbolo de lo ke dizimos por muestros inimigos ke los ke keren muestra maldad ke se aleshen de mozotros.
La datile ke se kome semboliza ke todas las negreruras ke tengan fin de agora endelantre.
La kalavasa es la sinyifikasyon de los zahutes ke azemos.
El peshkado semboliza la azlaha, la abondansa i el pujar. Ke muestros zahutes pujen komo el peshkado.
Una de las uzansas emportantes es ke se kome la kavesa del peshkado o de la gayina, ke es la sinyifikasyon ke syempre estaremos a la kavesa de todo modo de akontesimyento en muestra vida.
Avlando de las uzansas, me akodri de una tiya (zihrono livraha) ke mos kontava konsejas i evenementos i rekuerdos ke se aziyan en las fyestas.
Komo por egzempio, se tomava una kanata yena de agua, i se metiya delantre de la ventana afuera enriva de la garnitura (pervaz).
Esta kanata noche entera tomava las luzes, las ermozuras, las buendades ke viniyan del Dyo i al otro diya, toda la famiya deviya de lavarse la kara kon esta agua bendicha, yena de ermozuras para ke el anyo entero seya yeno de evenementos orozos, i sanedad.
Entremientes, kada anyo pasamos Kipur en la isla de Burgaz, en la sinagoga chika, ma muy entima, ande todos los yahidim son komo una famiya.
Ma este anyo a kavza de este virus corona, izimos las orasyones en el refektoryo de la koloniya, mas grande i mas espasyozo.
“Kol Nidre" es la promesa ke egziste entre la persona i Dyo.
En la kultura djudiya, la persona ke dyo una palavra kale absolutamente ke la detenga fina la fin. Esta palavra kale ke se realize i la persona no se puede arrepentirse.
Kipur es la ora de la teshuva, ke estamos demandando pardon de los pekados ke kometimos entre el anyo.
El sentimyento de la djustisya i el sentimyento del pardon son muy emportantes.
La kondisyon es la teshuva, ke es el arrepentimyento. Esto kere dizir ke la persona aksepta la kulpa ke kometyo. Esta perioda empesa en Rosh-Ashana kon los Selihotes.
Kol Nidre es la orasyon la mas ermoza i sentimental de Kipur. El Shofar, kon las bozes maraviyozas de Beni Albukrek i el ijo mos emosyono muncho. Esperamos ke el Todo Poderoso mos va pardonar todas las kulpas, i vamos a empesar la anyada kon mas muncha kerensya, tolerensya i solidaridad.
Estamos en el mez de las fyestas. Sukot alegre, Hag Sameah i un anyo yeno de sanedad i felisidad.
