EL FILMO NOVYA KE TE VEYGA

Dora NİYEGO Judeo-Espanyol
30 Eylül 2020 Çarşamba

"Novya Ke Te Veyga" es el primer filmo meksikano ke esta prosesando el tema de la entegrasyon kultural de las komunidades judiyas en Meksiko. El filmo esta amostrando la manera ke los judyos se estan adaptando a las dos kulturas, la kultura meksikana i la kultura judiya.

En los anyos kuarenta i sinkuenta, dos amigas mansevas Oshi i Rifke, de la komunidad judiya ke emigraron a Meksiko, se estan azyendo amigas entimas. La primera es de una famiya sefaradi, de orijen turko i una famiya konservativa. La madre de Oshi le esta ambezando a su ija a kuzir, a brodar. La kere aparejar para ke seyga una mujer de kaza. Eyos keren ke sus ija se kaze.  Rifke es de una famiya mas liberal. La famiya de Rifke bivyeron el Olokosto. Rifke esta kontra las tradisyones. Eya kere estudyar i azer su profesyon.

Rifka esta atirada a Saavedra, un mansevo kristyano ke tyene ideas komunistas.

La famiya de Oshi la estan espozando kon un doktor judyo, Leon. Leon esta kontrolando su espoza kada punto. Oshi no kere kazarse kon Leon, eya kere estudyar arte.

Eske Oshi va tener el koraje de romper el espozoryo kon Leon? Ya va pueder realizar su esuenyo de estudyar arte?

Kuando a Rifka. Es ke Rifka va pueder romper el korason de su padre en kazandose kon Saavedre?

Ma el tema prensipal del filmo es los sentimentos de los judyos ke biven en la diaspora, de ser divizados entre dos kulturas. En el empesijo del filmo, Oshi i su famiya estan vinyendo de Turkiya a Meksiko. El momento ke estan abashando del vapor, se esta vyendo ke no estan muy repozados porke vinyeron a un lugar ande no apartyenen. Estan avlando en Ladino. No saven ande se van a ir en este muevo lugar.

Kuando Oshi se aze de diziocho anyos, la konose a Rifke. Rifke la aze miembro de un grupo de mansevos ke se estan topando de vez en kuando i estan avlando sovre azer aliya a Israel.

Estos mansevos no se estan sintyendo muy konfortavles en este payis al kual no apartyenen ma en mezmo tyempo estan pensando ke son sivdadanos meksikanos. El prensipal tema del filmo es este sentimiento de ser divizados entre la identidad judiya i la identidad meksikana.

Kuando era chika, Oshi un diya vijito una iglezya katolika i disho de si para si, ‘Espero ke no me van a dizir ke so judiya’. De mizmo modo, Rifke kuando era chika, keriya tener un arvole de Noel komo las otras kreaturas.

Aparte de este sentimiento de ser divizados entre dos identidades, tyenen de tratar kon la forma ke los otros se estan komportando kon eyos. Las otras kreaturas se estan selando de Rifke i se estan burlando de eya kantando ‘Judiya, judiya’. 

Kuando se izyeron mas grandes, Oshi i Rifke se van a ver una piesa de Pesah. Rifke le dize a Oshi: ‘Esto es la razon deke no mos keren. Mos estan vyendo komo asasinos, ma no me konosen a mi’.

En el filmo entero, estamos vyendo el dezeyo dezesperado de las ijikas de ser akseptadas.

 

 

 

 

Siz de yorumunuzu yapın

Tüm Yorumları Görün