EDİZ BAHAR

Forti BAROKAS Judeo-Espanyol
15 Temmuz 2020 Çarşamba

Ediz Bahar nasyo en el anyo 1977 en Estanbol. Despues de la eskola primera, eskapo la universidad Galasaray, Fakultad de Administrasyon. Es kazado i padre de dos buchukes un ijo i una ija. 

Yo lo konosi a Ediz apenas teniya 11-12 anyos en el Dostluk Yurdu Derneği en la piesas musikales, “Los dulses suenyos de Yosef" i “Brodway”. Me empresyoni de su boz ermoza de kantar. El syempre diziya ke se kere azer kantador i topava muncho plazer de kantar en la shena. Su pasyon siempre fue azer la muzika profesyonalmente ma para el, su famiya era muy presyoza, troko de idea i penso ke si en una famiya no ay artistos es muy difisil de azer este ofisyo, prefero lavorar komo komersyante.

Ma el amor de la shena es kompletamente diferente; no se puede dar a entender sin bivirlo. Ediz nunka desho de kantar. Entro al klub de muzika de su universidad i salyo a la shena en AKM, CRR i en la eglisya AYA İRİNİ.

Kanto i izo vokal kon kantadores profesyoneles komo el grupo LADIES & GENTILMEN, kon Özcan Deniz, Alessandro Safina, Sezen Aksu, Albano, Ferhat Göçer i Barbaros.

En el anyo 2007, tomo el rolo prensipal en el musikal “MASSADA”, organizado yene por el Dostluk Yurdu Derneği, la piesa izo un grande sukseso kon la performans alavada de Ediz Bahar.

Este anyo desidio de entrar a una kompetisyon en un kanal de TV nombrada “BENİMLE SÖYLE”. Asperando kon emosyon todos mozotros, kon la pandemia komo todo i este program kedo. Kuando empesimos un poko a la vida normal mos avizo ke ya esta enpesando i ke kedo al final entre 1500 kantadores. Para mozos es un orguyo de ver un mansevo djudyo ke reusho a vinir fin el final. Esta semana era el grande final. Mos metimos enfrente la TV djusto a las ocho asperando a Ediz ke va kantar. 

Kuando vino su torno estava byen emosyonado. Kanto su kantika i tomo ermozos puntos ma no abasto para ser el primer. Entre tres finalistos el fue el sigundo ke para mi era absolutamente el primer. Este grado mezmo es un sukseso muy grande. Le oguro syempre ke vaya adelantre i nunka ke no kede sin kantar.

   

    

Siz de yorumunuzu yapın

Tüm Yorumları Görün