Louis Armstrong nasyo en New Orleans. Kuando el era una kreatura, su vida empeso muy leshos de "La Vie en Rose". Nasido de una madre de 16 anyos i un padre ke abandono la famiya, Armstrong se engrandesyo en la provedad ekstrema.
Armstrong desho la eskola para ganar paras por su famiya i empeso a lavorar komo mesajero allado de los Karnofskys. Los Karnofskys, una famiya judiya, empesaron a darle komidas kayentes kada noche, i le dyeron una kama para durmir. Tambien le izyeron otras buendades. Le dyeron sinko dolares para ke se merke una trompeta, i lo enkorajaron para ke kante. Anyos despues, Armstrong eskrivyo sovre la buendad ke los Karnofskys le izyeron, i la diskriminasyon ke esta famiya suporto por modo ke son judyos. Armstrong eskrivyo su memorya kon el titolo "Louis Armstrong i la famiya judiya en New Orleans".
Armstrong lavoro por los Karnofskys fin ke tuvo dodje anyos porke a estos anyos ya era "un poko grande para el lavoro". Mas despues, se izo el primer superstar de jazz, i la famiya Karnofsky entraron en mas grandes negosyos i ganaron munchas paras.
El ijo el mas chiko, David, se izo un shastre maestro, i siempre kedo en kontakto kon Armstrong. Las jenerasyones sigientes de los Karnofskys akurtaran la alkunya Karnofsky i la izyeron Karno i los miembros de la famiya se izyeron propietaryos de klubes de noche en el Barrio Franses. Nick Karno se izo el patron de munchos klubes de muzika de primer nivel. La relasyon entre la famiya i Louis Armstrong fue resiproka. Los Karnofskys le izyeron ganar munchas kozas ma Louis tambien, les dyo una apresiasyon por el poder kreativo del djaz.
"Los Karnofskys ya vyeron ke yo teniya grande kapasidad por muzika" disho Armstrong. "Me dyeron echo, me merkaron un enstrumento de muzika, me enkorajaron ke entre al echo de muzika, i asiguraron ke tenga el estomago yeno". A Louis, le plaziya muncho la komida ke komiya en sus kaza. Komo el lo disho: “Mi primera komida judiya fue kuando teniya siyete anyos. De la primera vez ke komi, me plazyo muncho. Kuando eskapava el echo tadre, mizmo si aviyan eskapado de komer, me aparejavan un chini i me diziyan, "Lavorates muncho, kale ke komas. Agora te vas a ir a tu kaza, ma ya va ser muy tadre para komer". Dainda me eskarinyo de las komidas judiyas, son muy savrozas i delisyozas. A las vezes, le digo a mi mujer ke me gize komidas judiyas. En Pesah merkamos matsa i la guadramos en un almaryo. De vez en kuando tomamos un pedasiko kuando mos dezeya".
Un otro judyo, Glaser, nasido de una famiya judiya rusa de Chicago, empeso a administrar Armstrong en 1935. Glaser, ke teniya relasyones kon la mafya, lo konosyo a Armstrong kuando Armstrong empeso a azer muzika en el famozo Sunset Cafe. Sus relasyon kontinuo anyos i anyos. Kon Glaser a su lado, Armstrong se konsintyo ke iva briyar mas muncho komo estreya de muzika.
Louis Armstrong, el lejendaryo kantadero, trompetisto, kompozitor i aktor, se estuvo vistyendo un kolye kon la estreya de David durante una grande parte de su vida, para amostrar ke karar de agradesido estuvo a los judyos.
