La semana pasada la organizasyon ke fue dirijada por el “Rav Nafi Haleva”, donde el lider era “Leon Esim” i el direktor “Kaan Sezerler” el sigundo i dalkavo konserto de esta sezon, “Biz Bize Fasıl Korosu” fue realizada en el “ZOOM” en la komputadora. En el repertuar riko de este konserto aviya kantikas en turko, en ladino i en espanyol.
El direktor “Kaan Sezerler” ke meldo la kantika “Zeh Hazman Lisloah” en ebreo emosyono a todos. “David Dalva kanto la kantika “Deniz ve Mehtap” (Mar i Luna) ke izo akodrar a todos las memoryas de sus manseves i a Dario Moreno, z"l.
“Leon Esim” en su avla disho ke este grupo no es un grupo profesyonal, el mas mansevo tyene 66 anyos i el mas vyejo tyene 88 anyos. Esto ke se realizo en el ZOOM no fue fasil ma se refujyaron en la tolerensya de los partisipantes ke son los aliados i remersyo a todos. Leon Esim en terminando su avla dyo la novela ke van a preparar un repertuar muevo en el enterval del enverano i esperando ke esta pandemia va pasar van a kontinuar las aktividades en invyerno.
El 9.5.2020 este grupo fue el envitado del Rav “Mendy Chitrik” i kon el Zoom dyeron un konserto maraviyozo. Este grupo es formado de 17 personas. Ay 5 anyos ke estan lavorando los 17 endjuntos. Se vistyeron en sus kazas kamizas blankas kon papyones pretos i izyeron pasar momentos alegres kon las kantikas konosidas . “Kaan Sezerler” kon su violin klasiko kanto una kantika ke dyo una savor, una kolor a la nochada inolvidavle.
Los dias de Corona mos mostro la produktividad i la enerjiya de muestra sosyedad. Los ke formaron este grupo son todos muy kapaches i muy vigurozos. Eyos estan lavorando invyerno entero kon muncha ardor i voluntad. Estan valorizando sus tyempos en azyendo aktivitades presyozas para la sosyedad i para eyos mizmos.
Felisitasyones a sus direktores kon los miembros i ke korran syempre de reushitades en reushitades…
