Tiempo de Solidaridad

Kenan CRUZ Judeo-Espanyol Sesli Dinle
10 Haziran 2020 Çarşamba

Los ultimos diyas, todos mozos vimos la grande indjustisya ke afito en los Estados Unidos kon la muerte de George Floyd, un ombre afro-amerikano ke fue asesinado por una polisiya. La polisiya echo George Floyd en basho i lo mantuvo ayi kon su rodiya durante munchos puntos. Esto todo fue gravado por djente ke estava pasando por la kaye i el video es reelmente devastador. No es kolay verlo kompletamente i oyir a Floyd keshando i diziendo ke no estava pudiendo respirar durante minutos i minutos antes ke muriyo. Naturalmente, kuando saliyo el video, milyones de personas en los Estados Unidos i en el mundo entero se incheron de ira i frustrasyon. Ansina, munchos salyeron a las kayes del payiz para protestar kontra el rasizmo. Malorozamente esta indjustisya no es una koza mueva i dingunos no kreyen ke no va akonteser de muevo en el futuro. La frustrasyon de saver ke el rasizmo esta engranado tan profundamente en los sistemas judisyales, politikos, ekonomikos, i sosyales del mundo mos dezespera muncho, ama tenemos ke kontinuar luchando para ke mas mansevos o mansevas, chikos o chikas, aedados o aedadas no mueran achakes de la violensia polisyal ke tambien es parte grande de este sistema.

 

Una de las kozas ke vimos despues de la muerte de Floyd es ke uvo mensajes desde todo el mundo. Djente diziendo ke no save komo el rasizmo puede ser tan prezente en los Estados Unidos, djente diziendo ke grasyas al Dyo en sus payiz la mizma koza nunka afita, i djente diziendo ke estavan en solidaridad kon las demonstrasyones kontra el rasizmo. Kale investigar un poko komo ay djente, tambien en la Turkiya, ke puede kreer ke el rasizmo no egziste aki. En la mizma semana ke esto todo afito en los Estados Unidos, uvo un atake kontra una iglesya armenia en Kuzgundjuk. Unos diyas despues, amenazas de muerte a los miembros de la fondasyon de Hrant Dink. Tambien en la mizma semana, uvo haberes ke un manseviko kurdo fue asesinado simplemente por aver avlado su lingua materna en publiko. 

 

Esto todo se pasa en un mundo paralel? Seguro ke no. Lo ke es sierto es ke para muncha djente es muy kolay apuntar a las indjustisyas ke afitan en tierras leshanas. Avlar sovre indjustisyas similares ke okurren delante de mozos es muncho mas difisil.  Seguro ke la solidaridad es muy importante, espesyalmente en kavzos komo lo ke pasa agora en los Estados Unidos. Ama tambien es vedra ke mozotros tenemos influensya en muestras komunidades, muestras sivdades, i muestra sosyedad. I si semos sinseros kon muestras yamadas kontra el rasizmo, kale ke seamos aktivos en mas serka tambien. 

 

 

Siz de yorumunuzu yapın

Tüm Yorumları Görün