Fin de semana, lunes i martes estavamos de muevo en kaza mizmo si teniyamos la posibilidad de salir a la kaye diya de Alhad, los ke son mas aedados de 65 anyos. I diya de Alhad tuve el mazal de azerme myembro del Club 65+. Ya savesh ke ay serka de un mez ke no es posivle de ir a las Islas. No se egzaktamente deke? Tengo una kaza en la Ada i pago el dasyo del apartamento i no tengo derecho de ir a mi kaza? Ya se ke ay syertas aplikasyones para mostrar ke es mi segunda kaza, i este modo ya puedemos irmos.
En la istoria ay las epokas ke trokan kon la konkista de Estanbol de 1453 o kon la revolusyon Franseza de 1789… Agora en muestra vida vamos a tener dos epokas: antes de la Korona i despues de la Korona. Ya savesh ke los dyes anyos dalkavo la moda es de ir a Bodrum o a Çeşme o Alaçatı para entrar a la mar i pasar el enverano. Mizmo ay muncha djente ke biven en Fransia, en la Suis, en la Inglatiera i ke pasan unos kuantos mezes en Bodrum o en otros kazales de la Mar Ege ande tyenen una kaza. Komo me karisheo a todo modo de koza en la Ada, so el diridjente del edifisyo ke tyene 17 kazas. I este fin de semana kon el muevo grupo de whatsapp eskrivi para demandar si estan vinyendo o no. Todos estan vinyendo, mizmo una partida de los mansevos ke van a Çeşme o Bodrum dyeron karar de kedarsen en la Ada porke dinguna mujer no kere ke su marido tome kada fin de semana el avion. Porke oy en diya todos se estan espantando de tomar el avion. Mos vamos auzar.
Diya de alhad organizaron un grupo de zoom kon un responsavle de la Munisipalidad de Estanbol sovre el Turismo, el prezidente de la fondasyon de las Islas, i patrones i dirijentes de los klobes, de los oteles i de los restoranes ke se topan en las Islas. Fue una seduta ke turo mas de dos oras i medya. Estava muy enteresante porke el ministerio de Turismo tomo karar para las aplikasyones ke se deven de tomar empesando kreo el empesijo del mez de djunyo. I reelmente va ser muy penivle. Kuando un musafir va vinir a un otel deve alimpyar sus kalsados; deven de tomar su temperatura, su validja deve ser dezenfektada, en kada paso deven meter un bokaliko de dezenfektan. I es una seremonia komo deven de kedarsen en sus kamaretas, komo se deven trokar las savanas si kontinuan a kedar o lo ke se deve alimpyar i komo; si desharon la kamareta para irsen. Es reelmente una koza ke se deve de estudyar. Para las plajes i las pisinas es un otro problem. La agua de la mar komo es salada, el virus no bive aya; i es la mizma koza para la pisina porke se mete klor aryentro. Ma komo vas a salir de la mar o de la pisina? Las eskaleras tyenen un lugar para detener; i todos tokan esto. Es el punto el mas danjeroso. La dush es el mizmo problem, todos van a tokar la partida ke es para avrir i serrar la agua.
I las shezlonges? Kualo es la distansya ke se deve de topar entre las shezlonges? Si son miembros de una famiya o si son dos kuples ke vinyeron endjuntos, 60 sentimetros es la distansya ke se deve de topar entre las dos. Ma si es una persona ajena deve de estarse a un metro i medyo. No kero pensar lo ke va afitar en los klobes en enverano. Kreo ke la mitad de los miembros no van a topar lugar para asentarsen o para espandirsen! Van a empesar a vinir a las 7 de la demanyana para topar una shezlong. Van a vinir a las 7 si topan esta posibilitad. Ma si la direksyon da karar ke va tomar las paras de solo 600 o 700 miembros para la pisina esto va ser una desgrasya. Esto va ser lo mizmo para todos los klobes. Estan mizmo avlando ke el Klub de Burgaz no va deshar ke la djente empleen shezlongez. Todos se van asentar en una siya para ke se les tuye en asentandosen oras enteras.
Los restoranes i los lugares ande los ke se kedan en los oteles van a tomar dezayuno va ser un otro problem. Kreo ke kada demanyana antes del desayuno kuando se va entrar en la sala vos van a mirar kualo es oy vuestra temperatura. Si es mas alta de 37,5 grado, “ayde a la kaye !”. Va ser la mizma koza kada diya kuando vash a vinir al klub o kuando vash a ir a un restoran si vos kedo gana. I en los restoranes va ser la mizma koza; 60 sentimos entre los miembros de una famiya i un metro i medio entre las dos mezas. Ma esto areyeva dainda muncho kaldo! Esta eskrito un metro i medio entre dos mezas. Si es mezas es komo oy; ma si es entre las siyas vash a tener syen personas al lugar de tresyentas; i esto va ser la fin de los restoranes…
Bivir i ver…
