La Vijita

Forti BAROKAS Judeo-Espanyol
20 Mayıs 2020 Çarşamba

Ya lo se muy byen ke para tener la salud buena kale kaminar. Todos los medikos mos rekomendan a lo manko al diya medya ora kaminar. Esto de akordo kon eyos, muy ralo kuando kamino en el bodre de mar me vyene bueno, akeya noche durmo bueno i digo kada diya va salir.  Ma la verdad dizir no me plaze demanyana matrana salir a la kaye, mas prefero bever el kaviko ke uzo. I la mas grande terapiya es konversar kon las amigas. Sovre todo estos diyas ya bushkimos djente hal de mi hal.  Es verda ke kon un mesaje kon emojis estas entendyendo kualo keren dizir ma las amigas senseras preferamos oyir una bozizika i demandar hatir. Para mi esto es la mas grande rikeza. 

Avlando kon una amiga ke bive en Israel, iva vinir a Estanbol por pasear, siguro achakes de la korona no pudo vinir, me vino al tino esta anekdot. 

El ijo regalado de madam Sara bive en Israel, kada semana le telefona a la madre para demandar komo esta. Una demanyana sona el telefon, madam Sara avre:

---ALO…

--- Mama tu sos? 

----Si, ijo de la madre; komo estas? 

----Muy bueno Mama, desidi de vinir a Estanbol por unos kuantos diyas. 

-----Vinido bueno i klaro ya me gusti muncho

-----Mama ya tyenes lugar? Ande me va echar?

-----Atyo pasha, no te merikiyes la kamareta tuya esta pronta aya te echas… 

Al otro diya le telefona de muevo. 

----- Mama

-----Si pasha 

-----Kere vinir i mi mujer 

---- Maraviya, ke venga en las buenas oras 

----Ande mos vamos a echar? 

-----Tu no te merikiyes, te do la kamareta miya 

----- Tu i el papa ande vos vash a echar? 

-----Es kolay, mos echamos en la kamareta tuya 

Al otro diya le telefona de muevo. 

----- Mama mi mujer no los kere deshar a los ijos; vamos a vinir kon los ijos 

----- Atyo ke lo bueno i los inyetos van a vinir? 

-----Ande se van a echar? 

----- En la kamareta de asentar presyado

------Tu i el papa ande vos vash a echar? 

-----Tu esto no penses ya mos echamos en la kamaretika chika 

Al otro diya un telefon. 

-----Mama?

-----Si pasha?

----- Kere vinir i mi suegro 

------ Tu suegro??? Eh, ke venga. 

-----Ande se va echar? 

-----Es kolay, en la kanapika del salon lo echamos 

----- Tu i el papa ande vos vash a echar?

----- No te estrecheyes presyado, ya mos  echamos en el koltukito del salon 

 Al otro diya un telefon.

----- Mama kere vinir i mi suegra! 

-----Tu suegra??  

----- Si Mama kon la ermana

------ Kon la ermana?? 

-----Ande se van a echar???

----- Ken byen se kere en poko lugar kave; las echamos en el mupak 

------Tu i el papa ande vos vash a echar? 

-----El papa lo kere ke aga. Yo me va echar por la ventana! 

 

 

Siz de yorumunuzu yapın

Tüm Yorumları Görün