Si le demandamos a un adolesente kuantas oras pasa en el dia en el internet, spesyalmente en las redes sosyales, mos soprendemos en frente de la repuesta ke mos van a dar.
El internet es una hazinura para los chikos, mansevos, aedados i para todos. Se puede pasar oras i oras bushkando en el “GOOGLE” kozas enteresantes, djugos para pasar el tyempo en vaziyo i munchos otros evenementos.
No mos rendemos kuento no solamente de las oras ke bolan, ma del dia entero enfinkados i pedridos delantre el ordenador…
Aserke si lo uzamos kon atansyon, el internet es edukativo i si se kere, la persona se puede ambezar munchas kozas sovre todo modo de espasyo. Ya savemos ke kerer muncho, es la miatad de azer, de reushir. Entonses kero atirar vuestra atansyon sovre la lektura ke es muy emportante para el konosimyento i el developamyento de la persona.
Meldar, mos avre las puertas del saverisyo i mos aze inspirar i imajinar kozas muevas i influensa muestra forma de ser, muestra vida.
Meldar es komunikar kon el de enfrente, es komunikar kon el mundo. Tenemos la liberta de meldar kualker koza kuando keremos, kuando tenemos tyempo vaziyo i ke keremos kultivarmos.
Enfin, meldar es razonar, krear i ver las kozas kon un ojo objektivo, leshos de prejuisyos i ideas kontradiktoryas a la realidad.
Si keremos ambezarmos las muevas teknolojias i no solamente ser sus esklavos, mos keda un kamino: Ambezar a meldar i entender lo ke meldimos. Kon los livros, las personas fundaron una komunikasyon ke duro siglos largos. La lektura permete el akseso a la kultura, a la tradisyon, a la informasyon, al konosimyento de las kulturas muevas i al pensamyento kritiko.