Lo ke mos aze ganar i pedrer la “CORONA VIRUS”…

Şeli GAON Judeo-Espanyol
6 Mayıs 2020 Çarşamba

Agora estamos en un tyempo ande ay 45 dias ke estamos enkarselados en muestras kazas ke no manken… Para guadrarmos de todos i de mozotros mizmo, tuvimos menester de meter distansya entre mozotros. Kedimos leshos de muestros ijos, ijas, de muestra famiya a kavza de las errores ke izo la umanidad. Mallogrimos el mundo.

Todos los paizes grandes i fuertes kedaron sin pueder defendersen enfrente de la fuersa de la natura.

  • Esto es la repuesta del mundo a la persona.
  • Esto es la repuesta del mundo ke es mas grande de la persona, i ke la persona no tyene dinguna fuersa enfrente de el.

Agora kualo estamos azyendo? Kada noche estamos asperando kon espanto i kon esperansa la deklarasyon del ministro de salud. El esta deklarando el nombre de kavzos, de hazinos, de muertos i otros detalyos sovre este virus maldicho. Entremientes mos estamos ambezando los kavzos de los otros paizes i estamos komparando.

            Despues de kaji dos mezes de enserramyento en kaza tenemos el dezeo de salir a la kaye, kaminar en el bodre de mar, bever un kafe kon una amiga, de pueder abrasar los keridos, de pueder avlar dos palavras, de pueder ir al echo i pueder kontinuar a produsir, de pueder viyajar, de pueder embiyar los ijos a la eskola kon las orasyones de reushita, de pueder resivir las noches los maridos, aparejar la meza para komer, ets. Esto todo ke estavamos azyendo estava muy ermozo.

              Agora miraremos kon un ojo optimisto. Kualo semos? Ande mos estamos indo? Kualo izimos yerrado en muestra vida? Kualo izimos manko? Kualo no izimos? Esto todo mos va ayudar a konosermos de si para si… Pensaremos un poko… Averiya munchas kozas ke izimos yerrado, ke no izimos en muestra vida. Si azesh atansyon no salyendo estamos en la vida. Para pueder kontinuar a bivir kale estar en kaza.

                Los siyantifikos izyeron una deklarasyon ke la kuvierta del ozon se amijoreo de 15%. Si no biviyamos esta pandemiya, puede ser ke en el mundo mas munchas personas se ivan a murir. Puede ser ke el mundo se iva trokar i no iva ser posivle de bivir. Los aviones ke no se estan indo a munchos paizes diferentes, las arabas ke no estan lavorando, las personas ke estan en sus kazas sin salir, el mundo se empeso a repararse de si para si i a melizinarse…

En todo modo de lugar en el mundo la natura se esta arribivyendo. Las aguas se estan alimpyando… En Venezzia los rios se alimpyaron i los peshkados salyeron en medyo.

Estamos puedyendo ver los delfines en los bodres de mar i el aver se esta alimpyando.

En las sivdades ke aviya la polusyon del aver ya se termino. No ay mas aksidentes de trafik, las gerras se terminaron, no ay bombas i armas… Todo el mundo se esta ayudando unos kon los otros. Los rikos estan azyendo grandes donasyones para los menesterozos.

Todos se estan okupando de sus kriyaturas i de las madres kon padres… Las personas se estan orientando a la konsyensya, estan azyendo meditasyon, estan meldando livros,  estan dando emportansa al desvelopamyento personal, se estan liberando de sus ambisyones i de sus egoizmos. Esto todo es un benefisyo para las personas.

             Devemos de ser orozos kon lo ke tenemos. No ay menester de tener muncho. Nada no es emportante mas ke la salud de la persona. Entendimos la valor de la liberta, la valor de la kerensya, de los animales, de lavorar endjuntos i de krear todos los paizes lo ke es menester.

             Corona virus mos ambezo ke las personas no biven en diferentes paizes, ma ke biven en un solo mundo. La kerensya ke se engrandeska, ke se enalteska, tendremos unyon i amaremos a todos sin djuzgamyento.

         

Siz de yorumunuzu yapın

Tüm Yorumları Görün