LOS EFEKTOS DEL VIRUS CORONA SOVRE LA PSIKOLOJIYA DE LAS PERSONAS

Şeli GAON Judeo-Espanyol
28 Nisan 2020 Salı

En el interval de toda la istorya umana, las personas syempre tuvyeron espanto de las hazinuras ke no se pueden kurar i ke reprezentan un riziko para la vida, un riziko de muerte. 

             Covid-19 es una epidemia ke salyo en la China i se propajo al mundo entero de la Australiya fin al Norte. La hazinura es Corona ke es una hazinura mortal malorozamente.

Este virus se propajo en mas de syen paizes, i esta influensando negativamente la psikolojiya de las personas. Estamos vyendo en una grande partida de las personas, el stres ke pujo, el espanto, no pueder durmir las noches, no pueder komer… Todos estan lavorando de sus kazas kon el computer, el internet. Una vida virtual.

                La vida sosyal i la vida edukativa se esta azyendo mas difisil de dia en dia. En esta situasyon devemos de tener panika? U devemos de estar repozados? Si miramos pozitivamente, tener este espanto mos esta dirijando a saver mas munchos detalyos sovre este virus, i estamos tomando prekosyones, mos esta oryantando a topar formas de proteksyones.

Ma la insertitud esta un grande problem. Komo no se topo dainda una kura u un vaksino, en todo los paizes los ke se estan muryendo estan pujando de dia en dia, tenemos una grande inkyetud en frente de la muerte…

            Kualo puedemos azer?

  • Devemos de azer atansyon a muestra salud sin salir a la kaye, sin ver a dingunos, sin tener relasyones kon la famiya i amigos.
  • Devemos de azer atansyon a muestra limpyeza, lavar las manos kada vente puntos, i a la limpyeza de muestra kaza.
  • Kale ke se tope un sprey de dezenfektan en muestra aldikera, una kolonya chika en la chanta i maskas para tapar muestra boka, nariz i oyidos.
  • No ay bezar, dar la mano al den frente, abrasar…

            La umanita tyene de pasar un egzamen kon la Corona.

            Este virus no esta mirando a la relijyon de los umanos, a la rikeza, a los aliados, amigos, a los inimigos, a las madres, padres, a los elevos, profesores, a los doktores…

De esto kale kitar una leson ke todos somos iguales, todos tenemos los mizmos derechos para bivir ande i komo keremos…

Todo se esta malogrando kon el dezekilibro de la natura i sosyal.

No ay dubyo ke oy esta korona ke esta amenazando la umanita entera, es el rezultado de multiplos ekilibros naturales i el ekilibro de las personas ke se bozdearon i trokaron de karakter. Para ganar mas muncho, las personas masakraron la natura, los animales, i esto trusho la epidemia, la derokasyon del mundo.

              La ambre del kapitalizmo esta ensuzyando el entorno, esta bozdeando el ekilibro del ekosistem, i esta provokando el kayentamyento global. Todos devemos de tomar lisyones de esta situasyon ke estamos bivyendo.

Ke mos seya kolay i livyano sin sar i sin mal! Amen.

            

        

 

        

                                                                                                                   

                                     

Siz de yorumunuzu yapın

Tüm Yorumları Görün