Suetos grandes i chikos por la dekada mueva

Judeo-Espanyol
5 Şubat 2020 Çarşamba

Kenan Cruz Çilli

 

El anyo pasado i en la dekada pasada tuvimos munchos haberes en la Turkiya sovre kales istorikos ke fueron restorados en partes diferentes del payiz. Klaro ke munchos de estos haberes son muy positivos i mos alegran a todos los sivdadanos turkos ke saven el valor de la erensiya kultural i la importansya de saver, ensenyar, i de kompartir la istorya multikultural del payiz ande bivimos. En pensando un poko me akodro de variyos momentos entre los anyos 2010-2019 de restorasyones i reavyerturas de sinagogas ke oy kontinuan avyertas, malgrado ke todas no son kehilas aktivas. La reavyertura del Kal Grande de Andirne fue uno de los momentos mas importantes i uno de los lavoros mas grandes ke se realizo en estos anyos. Ama tambiyen las restorasyones del kal de Bergama, dos kales en Izmir (el Kal de los Portugezes ke agora es espasyo kultural, i el Kal Beit Hilel ke es agora un muzeo chiko dedikado al rabino Hayim Palachi) i mas resientmente el kal de Gaziantep ande por la primera vez en 40 anyos se selebro el Hanuka son entre los echos grandes de la dekada pasada.

En los anyos ke vyenen tambiyen mos esperan mas momentos luzyos. En prinsipal projekto de la avyertura del muzeo djudio de Izmir deve ser el mas ambisyoso. Este projekto va a kreer un komplekso turistiko en la juderiya de Kemeraltı ande los kales mas ermozos i viejos de Izmir seran unidos en un espasyo muzeolojiko. Podesh segir todas las muevas notisyas sovre este projekto en sus pajina de Facebook: “Izmir Jewish Heritage Museum-Izmir Project”. Una parte importante de este projekto ya esta para realizarse kon la restorasyon de uno de los kales mas antiguos de Izmir ke se yama “Etz HaHayim” i ke esta previsto a eskaparse este anyo.

Puede ser ke en esta dekada algunos de los kales istorikos i dereliktos en Estambol tambiyen seran salvados i restorados. Akodravos ke en los mezes pasados eskrivi sovre la sinagoga olvidada de Galata, Or Hadash. Endjunto kon Or Hadash ay variyas sinagogas en las maales de Balat i Hasköy ke tambiyen esperan sus turno a ser restoradas. Por egzemplo en la kosta de Balat se topa el Kal de Selaniko ke ya esta abandonado aze munchos anyos. En la otra parte del Kuerno de Oro, en Hasköy, la Sinagoga de Abudara i la Sinagoga Mayor tambiyen esperan un futuro mas luzyo. Tambien ay etapas ke seriyan mas kolay a realizar. Por egzemplo, en la kosta de Hasköy ay una sinagoga vieja ke se yama Esgher i ke agora es un kafe/restorante. Visitantes del kafe no pueden saver ke antiguamente este edifisyo fue una sinagoga porke no ay una plaka de enformasyon ni en su interior ni en su eksterior. Klaro ke seriya maraviyozo si una plaka kon el nombre del kal i su data de konstruksyon era kolgada aya.

Ya se ke no es kolay kreer ke todos estos suenyos se van a realizar. Ama si pensash, tambiyen era difisil imajinar ke el Grande Kal de Andirne seria restorado o ke las kandelas de Hanuka serian asendidas en Gaziantep. Siempre es bueno tener suenyos grandes i entonses, estos son mis suetos grandes i chikos por la dekada mueva.

 

 

Siz de yorumunuzu yapın

Tüm Yorumları Görün