Las kreaturas tienen menester de arte

Dora NİYEGO Judeo-Espanyol
18 Aralık 2019 Çarşamba

El eskritor Philip Pullman esta diziendo ke las kreaturas tienen menester de arte, de kuentos, de poemas i de muzika djusto komo tienen menester de amor, de komer, de tomar aver limpyo i de djugar. Si a una kreatura no le das a komer, el danyo se ve muy presto. Si no le das amor, no lo yeves a kaminar, o no lo deshes ke djuge, el danyo no se ve tan presto. Puede ser ke el danyo se ve anyos despues.

Ma si no le das a una kreatura arte, istorias, poemas i muzika, el danyo no es tan fasil a ver. La kreatura puede koryer, saltar, nadar, komer kon ambre ma una koza le manka.

Ay personas ke se engrandesen sin arte i son orozos, i biven vidas buenas. En sus kazas no ay livros, no ay pinturas, ni oyen muzika. Ma ay otras personas ke un diya se rankontran kon arte ke nunka antes aviyan vido. El arte les viene muy etranjero. Un diya oyen en la radio una persona ke esta meldando un poema, o pasan por una kaza kon una ventana avierta de ande viene la boz de un piano, o ven una pintura en una pared. Enduna se sienten mareados, i se apersiven ke estan ambiertos por arte mezmo ke no teniyan dinguna idea de esto. Se sienten una ambre muy dulse i muy delisioza ke kaji les rompe el korason. Se sienten ke estavan muy solos fin agora, i ke una koza les mankava. Toman muncho plazer de esta eksperiensa mueva i keren mas muncho ver i oyer. Fin agora teniyan menester de esto komo una persona ambierta. Si no rankontravan el arte puediyan pasar toda la vida kon una ambre kultural sin saverlo.

Los efektos de la ambre kultural no se ven muy presto, i ay personas ke nunka lo sienten. Ma esta ambre egziste en munchas kreaturas, i munchas vezes no se eskapa porke no fue espertada. Munchas kreaturas en todas las partes del mundo estan ambiertos de una koza ke alimenta sus almas de una manera ke nada lo puede azerlo. Djusto komo todas las kreaturas tienen derecho a la alimantasion, al refujio, a la edukasyon, tiene tambien derecho a la eksperiensa de la kultura. Kale entender ke sin konsejas, poemas, pinturas, las kreaturas se mueren de ambre.

 

Siz de yorumunuzu yapın

Tüm Yorumları Görün