İsak Eskinazi
Un otro produkto importante de la ekonomiya era el Arvole de Sedra. (Sedir Ağacı) ke se enkontra muncho en Fenisya (Lübnan), arvole ke ya se konosiya desde aze mas de 5.000 anyos. Este arvole tuvo un sinyifikado spiritual en munchas de las kulturas viejas del Medio Oriente. Por los Sumerios este arvole se konsiderava komo el “Arvole de la Vida”, ke tanbien sembolizava el poder, la saviduriya sekreta, el mistisizmo i la immortalidad.
El Arvole de Sedra, por las nasyones de Mezopotamya, era el arvole de la Kreyensya, de la intelijensya i de la Majiya.
El Sedra se eksportava a payizes komo Ejipto, Gresya i a otros paises a traves el Mediterraneo. La rechina de este arvole se utilizo para momifikar los Paros de Ejipto.
El Sedra es muy famozo por su aroma i por su rezistensiya porke no se pudre i reziste kontra los guzanos.
Los barkos i las konstruksyones importantes se aziyan kon este arvole. El Beth ha Migdash fue konstruido kon este arvole, ke el Rey Hiram de Tyra le embiyo desde Fenisya a Shelomo aMeleh.
Los Romanos utilizaron este arvole lo mas en las konstruksyones importantes del Imperio. El famozo Templo de Artemisa de Efeso ke era una de las siete maraviyas del Mundo de la Antikuedad, fue tanbien konstruido kon este arvole. En la istorya, la azete de Sedra, se konosyo komo melizina para la tos, para urinar, para kalmar los inyervos, para el estomago, para la golor de sudor i para el masaj. Oy tanbien se esta vendyendo miel de sedra a un presyo bastante karo.
Por fin, un artikulo ke fue importante en la ekonomiya de la antikuedad fue el Safran. Su komersyo empeso desde aze 4.000 anyos.
Se dize ke para tener un kilo de Safran se tiene de menester a lo menos 150.000 flores para tomar sus etaminas i es por esta razon ke se vende i se vendiya muy karo.
Los Gregos i Romanos de la antikuedad empleyaron el Safran komo deodorante, para azer ofrendas a los dios. Los Persos empleyaron el Safran para pintar, komo melizina, i se dize ke puediya servir komo afrodizyako.
La palavra Safran vyene de la palavra Amariyo ke en Arabo es “Asfar”.
La planta de Safran ke es amariya, en arabo se yama “Zaferan. En Mardin ay un monasterio de los Asirios (Süryanis), ke oy en diya esta aktivo i se yama “Dar ül Zaferan” (la kaza amariya).
Los Fransezes yamaron Safran al “Asfar”, i Safran fue adoptado por munchos paizes komo nombre de esta planta.
Safranbolu es el nombre de la sivdad en Turkiya, ande se kultiva el safran. Esta sivdad es famoza tanbien por sus kazas tipikas de tavla.
