La emportansa de la lektura en una sosyedad teknolojızada

Şeli GAON Judeo-Espanyol
18 Eylül 2019 Çarşamba

Si le demandamos a un adolesente kuantas oras pasa en el dia en el internet, spesyalmente en las redes sosyales (sosyal ağlar), mos  soprendemos (şaşırmak) en frente de la repuesta ke mos va dar.

El internet es una hazinura para los chikos, mansevos, aedados i para todos. Se puede pasar oras i oras bushkando en el “GOOGLE” kozas enteresantes, djugos para pasar el tyempo en vaziyo i munchos otros evenementos.

No mos rendimos kuento no solamente de las oras ke bolan, ma del dia entero enfinkados i pedridos  delantre el ordenador…

Aser ke si lo uzamos kon atansyon, el internet es edukativo i si se kere, la persona se puede ambezar munchas kozas sovre todo modo de espasyo. Ya savemos ke kerer muncho, es la miatad de azer, de reushir.

Entonses kero atirar vuestra atansyon sovre la lektura ke es muy emportante para el konosimyento i el developamyento de la persona.

Meldar, mos avre las puertas del saverisyo i mos aze inspirar i imajinar kozas muevas i influensa muestra forma de ser, muestra vida. Meldar es komunikar kon el den frente, es komunikar kon el mundo. Tenemos la liberta de meldar kualker koza kuando keremos, kuando tenemos tyempo libre i ke keremos kultivarmos.

• La lektura mos mantyene bivos, al koryente de todo lo ke se esta pasando en el mundo.

• La lektura aze pujar muestra kuryozita. Mos mantyene enformados sovre sujetos diversos.

• Esperta muestra imajinasyon.

• La lektura alimenta muestra enspirasyon.

• Aktiva la memorya.

• Mos aze akodrar, konoser i aprender.

• Libera muestras emosyones, alegriyas, tristezas, amores i sentimyentos diferentes.

• Mos mantyene okupados, entretenidos.

• La lektura mos permete de konosermos mijor a mozotros mizmos.

• Ayuda a la kompreansyon de los tekstos, amejora el vokabularyo (kelime hazinesi) i la eskritura.

• La lektura aze ke mos syentamos aktivos, i mos aze aminguar el stres.

• Puedemos dizir ke la lektura es el remedyo el mas aktivo para el konosimyento ke enrikese muestra vizyon de la realidad, intensifika muestro pensamyento lojiko i kreativo, i fasilita la kapachidad de eksprimarmos.

Enfin, meldar es razonar, krear i ver las kozas kon un ojo objektivo, leshos de prejuisyos i ideas kontradiktoryas a la realidad. Si keremos ambezarmos las muevas teknolojias i no solamente  ser sus esklavos, mos keda un kamino: Ambezar a meldar i entender lo ke meldimos.

Kon los livros, las personas fondaron una komunikasyon ke duro siglos largos.

La lektura permete el akseso a la kultura, a la tradisyon, a la enformasyon, al konosimyento de las kulturas muevas i al pensamyento kritiko.

 

Siz de yorumunuzu yapın

Tüm Yorumları Görün